Edi Paloka ka konfirmuar se grupi i Rithemelimit ka kërkuar dorëheqjen e Enkelejd Alibeaj si kryetar i Grupit Parlamentar të PD.
Paloka tha se Alibeaj po ndjek axhendën e Ramës për përçarjen e PD.
“Enkelejd Alibejaj vjen të flasë për bashkimin dhe e fillon mbledhjen e grupit me axhendën e Ramës. Nuk e di si mund të flitet për bashkim kur ai e nis mbledhjen ‘këto deputetë janë përjashtuar dhe Berisha është përjashtuar’. Alibeaj ka shkelur parametrat e kryetarit të grupit. S’mund të jetë është i shkarkuar. E kemi pranuar që të mos fillojmë një përçarje të re po për të bashkuar gjithçka që la Lulzim Basha”, tha Paloka për gazetarët pas mbledhjes së grupit parlamentar të PD.
“Alibeaj e ka sjellë situatën në këtë pikë, po ecën në vazhdimin e axhendës së Ramës dhe janë kryer veprime që tregojnë si po ecën ky grup i vogël. Alibeaj pa asnjë tagër ka bërë një numër emërimesh këshilltarë, sekretarë, pa pyetur askënd. Këto mund të duken banalitetet, por tregojnë mentalitetin se si po ecin këta njerëz”, tha Paloka.
