Dinamo u mposht në duelin e mbijetesës nga Kastrioti dhe tashmë misioni për të qëndruar në superligë vetëm ndonjë mrekulli mund t’a shpëtojë.
Pas ndeshjes trajneri Rodolfo Vanoli u shpreh se blutë kanë gabuar vetëm ndaj Egnatias, ndërsa uroi Kastriotin për fitoren.
“Mendoj se në këto tre ndeshje skuadra ka gabuar vetëm kundër Egnatias. Sot ekipi u paraqit mirë, ndryshuam skemë, tentuam të jemi më sulmues, por nuk arritëm nivelin që patëm kur ishim më mbrojtës. Janë situata kur mjafton edhe një gjysmë gjuajtje për të pësuar gol. Urime kundërshtarit, ata nuk vodhën asgjë, bënë ndeshjen e tyre.
Goli i pësuar? Ky është një problem i madh. Si ndaj Tiranës, Egnatias dhe sot, pothuajse janë gabimet tona te golat e pësuar. Mund të pësosh gol, por jo t’u falësh gola kundërshtarëve.
Mbijetesa? Jo, nuk është çështje e mbyllur. Nuk është se djemtë nuk po luftojnë. Do të japim maksimumin, unë flas për këto tre ndeshje, nuk mund të flas për atë që ka ndodhur përpara. Duhet të besojmë deri në fund, të japim maksimumin, pasi kemi detyrime ndaj presidencës dhe tifozëve”, deklaroi trajneri italian.
