Ermonela Felaj, e cila po drejton seancën parlamentare të ditës së sotme, u akuzua se po shkelte Kushtetutën dhe Rregulloren e Parlamentit, duke mos lejuar deputetët e opozitës që të flasin.
Debati nisi kur Ermonela Felaj nuk lejoi më shumë se dy minuta ish-Kryeministrin Sali Berisha, duke i kujtuar se ai nuk është pjesë e Grupit Parlamentar të PD dhe si i tillë nuk mund të fliste më shumë se koha që ndahej mes deputetëve pa grup parlamentar.
Kundër Felajt reaguan Flamur Noka, Edmond Spaho, Albana Vokshi dhe Oerd Bylykbashi, të cilët i kujtuan drejtueses së seancës Kushtetutën dhe Rregulloren e Kuvendit.
Vokshi kërkoi nga Felaj se mbi çfarë baze ndan kohën mes deputetëve, qoftë edhe kur ato janë të pavarur, ose pa grup parlamentar. Vokshi tha se askush nuk ka të drejtë që një deputet ta konsiderojë me apo pa grup parlamentar.
“Kush jeni ju që përcaktoni nëse unë jam apo jo pjesë e një Grupi Parlamentar? Unë jam votuar nga shqiptarët si deputete e PD-së, atëherë mbi cilën bazë Ju na thoni që s´jemi pjesë e grupit parlamentar? Edhe sikur ne të mos kemi grup parlamentar, kush jeni ju që na ndani kohën, pasi ne mund të merremi vesh vetë për kohën që kemi në dispozicion”, tha Vokshi.
Ndërsa Oerd Bylykbashi duke iu drejtuar Felajt i kujtoi se mandate i deputetit dhe qenia e tij në një grup parlamentar nuk përcaktohet nga vullneti i drejtueses së seancës.
“Kushtetuta, por edhe Rregullorja e Kuvendit, por edhe Komisioni Qendror Zgjedhor, ku jep mandatet e përcakton qartë se çfarë përfaqëson një deputet, cilës forcë i përket dhe në cilin grup parlamentar bën pjesë, përveç rasteve kur deputeti bën një deklarim ndryshe në seancën e parë të Kuvendit. Atëherë kush jeni ju që na përcaktoni se në cilin grup bëjmë pjesë ne, ka ndonjë vendim të Parlamentit? Unë nuk di të ketë asnjë vendim, ndaj respekto Kushtetutën dhe Rregulloren”, tha Bylykbashi.
Në përgjigje të deputetëve demokratë, Felaj tha se kur ndahet koha parlamentare, ajo që përcaktohet është se 1 deputet nuk mund të flasë më shumë se 10 minuta, ndërsa për deputetët pa grup parlamentar, koha në dispozicion është 21 minuta në total dhe secili flet 2 minuta.
