Armando Broja ka përfunduar në shënjestrën e shumë klubeve të njohura dhe jo vetëm në Angli. Në itali janë disa klube të ndryshme që po monitorojnë sulmuesin e përfaqësueses shqiptare dhe një prej tyre është edhe Napoli, i cili mund të humbasë Osimhen në verë dhe ka nevojë për një lojtar që të luajë në qendër.
Klubi ka dërguar vëzhgues në javët e fundit për të ndjekur nga afër sulmuesin shqiptar. Por gazetari i njohur italian, Paolo Barxhixha, ka bërë të ditur se gjithçka mbetet në sferën e vlerësimit e jo më tepër, pasi lojtari është shumë i shtrenjtë për arkat e klubit napolitan.
“Napolit i pëlqen, është një sulmues shtatlartë, në pronësi të Çelsit, por realisht është një operacion që nuk do të mundohen ta realizojnë”, tha ai në një emision radiofonik në “1 Station Radio” në Itali.
“Për djaloshin flitet për shifra të rëndësishme dhe nuk vlerësohet si zëvendësuesi ideal i Osimhen në rast shitje të këtij të fundit, edhe pse e ndjekin. Nuk ka asnjë marrëveshje në këtë moment. Broja cilësohet si një lojtar shumë i fortë dhe i aftë që të kryejë rolin si të sulmuesit të parë, ashtu edhe të dytë, por gjërat nuk kanë shkuar më tej. E vërteta është që gjithçka flitet është shumë e parakohshme”, theksoi Barxhixha.
