Tottenham ka mundur 4-0 Aston Villa-n në javën e 32-të të Premier League dhe ka hedhur një hap të rëndësishëm përpara në garën për vendin e katërt.
Një fitore mbresëlënëse e arritur në transfertë për skuadrën e Antonio Conte-s, që tani ka një avantazh prej tri pikësh ndaj Arsenal-it, i mundur sot 2-1 në shtëpi nga Brighton, por me një ndeshje për të rikuperuar.
Lojtari i ndeshjes së luajtur në Villa Park ka qenë padyshim Son. Ylli i Spurs ka qenë autor i tre golave. Koreanojugori ka hapur ndeshjen në minutën e tretë dhe e ka mbyllur atë në të 71-ën, pasi ka realizuar golin e tretë për ekipin në të 66-ën.
Son Heung-min ka shënuar numrin më të lartë të golave pa penallti në këtë sezon të Premier League: 17 – Son Heung-min, 15 – Mohamed Salah, 14 – Diogo Jota, 12 – Sadio Mane, 10 – Kane, De Bruyne, Vardy, Ronaldo.
Goli tjetër është realizuar nga Dejan Kulusevsky, i cili po rezulton shumë vendimtar pas transferimit nga Juventus-i në merkaton e janarit.
Protagonist edhe Harry Kane. Edhe pse nuk ka arritur të gjejë rrugën e golit sot, sulmuesi anglez ka dhënë kontributin e tij me dy asitet e dhëna për golin e dytë dhe të tretë.
