Ka një lidhje të pashpjegueshme të kryeministrit Edi Rama dhe tersit që ndjek skuadrat e futbollit, simbolet e të cilave ai i mbart në veshjet e tij në daljet publike. Aq e dukshme është kjo, sa që është kthyer në objekt humori në rrjetet sociale, ku tifozët e njërit apo tjetrit ekip luten që ‘i gjati’ të mos shfaqet me logon e skuadrës së tyre të zemrës.
Kreu i qeverisë ka deklaruar simpatinë e tij për Juventusin dhe vitet e fundit ka zgjedhur të paraqitet me veshje me logon e kësaj skuadre, në aktivitete të ndryshme. Çuditërisht, pas këtyre daljeve të udhëheqësit të vendit, ekipi italian ka pësuar humbje zhgënjyese.
Herë në kampionat e herë në Champions Legue, me tifozët e “Zonjës së Vjetër” që kanë fajësuar Skënderbeun e Elisës për rezultatet negative.
Kjo lidhje megjithatë, nuk duket të jetë vetëm me Juven. Në vitin 2019, njeriu që sipas një ish-ministreje të tij “është rrugës për tu bërë Zeus”, u shfaq me një xhup me simbolin e Lilevrpool. Fill pas kësaj, skuadra angleze barazoi me Everton dhe City i mori vendin e parë.
Këtë herë, ata që e fajësuan ishin tifozët e Bayern Munich. Në një aktivitetet në Berat disa ditë më parë, Rama u shfaq me një xhup me logon e skuadrës gjermane. Historinë e dini! I futur si pretendent absolut në takimin e parë çerekfinal të Ligës së Kampionëve, gjermanët humbën dje 0-1 përballë Villarreal – që në kampionatin spanjoll janë në vendin e shtatë.
Në një postim në FB, ish-deputeti socialist Andis Harasni shkroi: “S’ka problem. Mbaj xhupin e Bajern. Veç mos vish xhup të Shqipërisë se do e çosh tamam në varr. Leje kështu buzë greminës si e ke lënë”.
