Ditën e sotme është zhvilluar protesta e paralajmëruar më parë, kundër punimeve që po mbahen në sheshin e “Flamurit’ në Vlorë, për ta kthyer këtë të fundit në një terminal autobuzësh.
Ky projekt është kundërshtuar me forcë nga qytetarët vlonjatë, por jo vetëm, duke bërë bashkë edhe protestues të tjerë të ardhur nga rrethe të ndryshme të Shqipërisë.
Mes të tjerave, një prej protestuesve u shpreh se sot në datën 7 prill, që përkonte me pushtimin fashist, ditën e sotme po protestonin për ta mbrojtur nga vetë shqiptarët.
“Kemi ardhur këtu që me shpresë të Zotit, të çlirojmë këtë shesh nga zaptimi. Sot është një ditë e zezë për Shqipërinë, 7 prilli i pushtimit fashist dhe pikërisht sot po vijmë të çlirojmë sheshin nga shqiptarët. Po luftojmë kundër njëri-tjetrit. Kur fyen sheshin e kombit, fyen të gjithë shqiptarinë”, tha një prej protestuesve.
Protestuesit janë shprehur 3 kërkesat e tyre kryesore.
Ata u shprehën se vetëm me anë të frikës, Kryeministri Edi Rama mund të ndryshonte qëndrim pasi ndryshe nuk arrinte të arsyetonte.
“Na mori shpirtin, na mori katandinë. Këtu më ke Edi Rama, unë jam Luan Pera nga Mallakastra. Ti je një pikturaxhi, vetëm të pikturosh dhe të shkatërrosh di. Nuk bën asgjë, po u prish njerëzve shtëpi e katandi, por Zoti nuk do të japë mbarësi.
Të prishet menjëherë kjo katrahurë që ka bërë këtu. Sheshi të kthehet në identitet. Të bëhet transparencë për çdo lloj investimi. Ky e ka vetëm me frikë mor vëllezër, se këtij arsyeja i është bërë fushë. Frika e tij tanimë është që mos të bëhemi shumë protestues këtu. Ky nuk është i vetmi maskara që i ka bërë këto të zeza. Nuk mbaron me kaq, ta dijë kryeministri që kemi, që po i themi kryeministër për etikë”, ishin disa nga mesazhet e protestës.
