Kryeministri Edi Rama u shpreh mbrëmjen e sotme në emisionin “Opinion” se ai nuk ndjen asnjë lloj përgjegjësie lidhur me shkeljet e ligjit që mund ti bëjë çdo bashkëpunëtor i tij.
Rama u pyet nëse ndjen ndonjë përgjegjësi kur një ish-ministër, Lefter Koka, dhe ish-deputeti, Alqi Bllako, ndodhen në burg për aferën e inceneratorëve, ndërsa u shpreh “nëse ti bën një gjë pa lejen e babait tënd, mban përgjegjësi babai jot”.
“Unë me Lefter Kokën kam bashkëpunuar në mënyrë të shkëlqyer. Koka dhe Bllako ishin te partia tjetër, dhe me sa kam parë deri tani, Lefter Koka akuzohet për vepra që nuk i përkasin procesit në vetvete, por akuzohet për marrëdhënie korruptive me të tretët”, tha Rama.
Ai shtoi se “që nga momenti që i jep mandatin një ministri, iu them, në atë karrige jeni ulur se ju kam zgjedhur unë, dhe për çdo gjë që do të bëni pas shpinës sime do të përgjigjemi personalisht”.
Rama u pyet nëse ndjen përgjegjësi morale, ndërsa tha se “kur unë them në këtë vend do ketë drejtësi, dhe drejtësia nuk shef majtas dhe djathtas, por kujt i rrëshket këmba do përballet me drejtësinë, atëherë çfarë përgjegjësie duhet të kem unë”.
“Alqi Bllako përsa i takon pjesës së dukshme të punës nuk ka asnjë të sharë, por nëse i ka bërë ato që ka nxjerrë hetimi, do të përgjigjet para ligjit”, tha Rama.
Sipas tij, çështjen po e heton SPAK dhe do ta hetojë deri në fund.
