Nga Boldnews.al
Nëse statistikat do ishin tregues për gjithçka, kreu i Kadastrës Shqiptare Artan Lame do fliste pa pushuar dhe me shkop në dorë për 24 orë rresht. Treguesin janë se shumë legalizime janë bërë në banesa, resorte, hotele, restorante dhe pallate, por ka edhe një statistikë tjetër që më së paku Lamen do e bënte memec.
Legalizimet në shumë raste janë kryer në mënyrë selektive. Pikërisht kur rruspat e pushtetit nisin shkatërrimin e banesave në emër të zhvillimit, për hapjen e rrugëve të reja apo edhe për ndërtimin e njësive të shërbimit dhe pallateve, rezulton edhe pabarazia e madhe. Një banesë e legalizuar, një tjetër ngjitur saj pa legalizim, duke ndjekur rrugën e selektimit dhe lënë hije të mëdha dyshimi se legalizimet janë kryer kundrejt korrupsionit nga paraja, apo “korrupsionit të ndërhyrjeve” nga miqtë e pushtetit.
Në të paktën katër raste kur u prekën disa blloqe banimi ka dalë në pah mënyra e selektimit përsa i përket legalizimeve. Në zonën e Unazës së Re në Tiranë, edhe pse ishte përcaktuar si “e palegalizueshme”, pasi kalonte projekti i rrugës, u konstatua se disa banesa ishin legalizuar. Kjo kishte ndodhur jo vetëm në “kundërshtim me parimet”, por edhe të ligjit, që vetë pushteti e trumbetonte.
Edhe në lagjen “5 maji” në Tiranë u pa e njëjta praktikë e dyshimtë, ku pavarësisht se e gjithë njolla e parashikuar për ndërtim ishte në hartën e zonave që lejohej legalizimi, disa familje nuk e kishin marrë certifikatën e pronësisë. Pavarësisht se kishin aplikuar që nga viti 2006 dhe prej më shumë se një dekade bënin ecejake duke i përcjellë pafund, deri në momentin kur një ditë u trokiti në derë fadroma e shkatërrimit.
E njëjta situatë është konstatuar edhe në zonën e Shkozës në Tiranë dhe Laprakë ku po kryhen punime për ndërtimin e Unazës së Madhe. Selektimi në legalizimin e banesave është mëse i dukshëm, ku pavarësisht hapjes së thesit në prag të fushatave elektorale shumë shtëpi nuk janë legalizuar duke shënuar një statistikë të frikshme ku bëhet dallim mes personave, pavarësisht se kanë ndërtuar në një njollë.
Disa janë trajtuar si të njerkës dhe të tjerë si të nënë, duke ngrohur edhe xhepin nga kjo e fundit. Treguesit janë aty kur shumica e personave të proceduar për korrupsion dhe shpërdorim detyre janë nga radhët e Kadastrës në të gjithë vendin.
