Që prej mesditës së djeshme, deri në orën tetë të mëngjesit të kësaj të hëne, qarkullimi në Rrugën e Arbrit është ndaluar totalisht.
Kjo sepse është shembur një masiv i dheut në afërsi të tunelit të Murrizit, në Xibër, në Bashkinë e Klosit.
Qindra metra kub dhera mbuluan rrugën në një gjatësi prej më shumë se 50 metrash, duke paralizuar qarkullimin e automjeteve në të dy anët e lëvizjes.
Është dashur ndërhyrja për më shumë se njëzetë orë që dy mjete të vëna në dispozicion të largonin dheun e rënë në asfalt.
Rruga u hap vetëm me një sens të lëvizjes. Dheu vazhdon që të zbresë poshtë duke rrezikuar jo vetëm bllokimin e qarkullimit, por edhe rrezikon edhe të zërë automjetet që kalojnë në këtë segment.
