Drejtori i Përgjithshëm i Policisë së Shtetit, Gledis Nano raportohet se po zhvillon një takim në SPAK me kreun e Prokurorisë së Posaçme Arben Kraja.
Në takim raportohet se janë edhe kryeprokurori i Elbasanit, Kreshnik Ajazi dhe drejtori i Krimeve, Tonin Vocaj.
Nuk dihet arsyeja e takimit, që vjen pas arrestimit të ish-deputetit të PS Alqi Bllako për dosjen e inceneratorit të Fierit.
Për arrestimin e Bllakos u raportua të enjten, megjithatë ngjarja u mbulua nga misteri. Të gjithë kaosin e krijuar, Policia e Shtetit dhe Prokuroria u munduan ta qartësojnë dje me dy njoftime zyrtare, disi kontradiktore, duke lënë sërish pikëpyetje mbi arrestimin e ish-deputetit Alqi Bllako.
Policia e Shtetit njoftoi se ish-deputeti ishte dorëzuar dhe ndodhej në Drejtorinë Vendore të Policisë Tiranë që prej mbrëmjes së Enjtes.
Nga ana tjetër, Prokuroria e Posaçme bëri me dije se ekzekutimi i masës së arrestit me burg për Alqi Bllakon është bërë në orën 03.30 të së Premtes.
