Armando Broja nuk p arrin që të tregojë maksimumin e tij edhe për faktin e thjeshtë se kundërshtarët po i bëjnë shumë faulle. Tashmë është e qartë se për të ndalur sulmuesin shqiptar shpesh duhen ndërhyrje të ashpra, të cilat jo gjithmonë sanksionohen nga gjyqtarët.
Një e tillë, ku gjyqtari nuk ndërhyri, i kushtoi shtrenjtë Sauthempton në ndeshjen e sotme në Premier Ligë. Skuadra e Lids kaloi në avantazh në minutën e 29, pas një aksioni që nisi me një faull kundër Brojës në mesfushë, një moment për të cilin trajneri i Sauthempton, Ralf Hasenhutl, protestoi gjatë ndeshjes dhe të cilin e komentoi edhe në fund të sfidës.
“Ishte një ndeshje e vështirë për t’u drejtuar nga gjyqtari, pasi kishte shumë faulle dhe shumë duele intensive. Broja është i shpejtë dhe kur kalon topin para kundërshtarit apo mbrojtësit, atëherë e vetmja mënyrë që ke për ta ndalur është me trup dhe pastaj është në dorën e gjyqtarit të vëndosë nëse është faull apo jo.
Ai tha jo dhe nuk duhet të ankohemi. Duhet të mbrojmë dhe kjo është ajo që ne nuk bëmë në këtë moment dhe pastaj pësuam një gol aty ku normalisht ka një mundësi shënimi për ne, është pak zhgënjyese dhe e bezdisshme”, tha Hasenhutl.
