Mediat ndërkombëtare po i bëjnë jehonë faktit se një deputet i mazhorancës socialiste në Shqipëri rrezikon arrestimin dhe dënimin për skandalin e inceneratorëve.
Portali i Brukselit, EuroActiv shkruan se skandali prej 430 milionë eurosh është më i madhi në historinë e qeverisjes shqiptare.
“Alqi Bllako, një deputet socialist, ka dhënë dorëheqje nga mandati i tij parlamentar dhe po përballet me arrestimin për rolin e tij në një skandal korrupsioni prej 430 milionë eurosh, në atë që mund të jetë skandali më i madh korruptim i qeverisë në Shqipëri deri më sot”, shkruan portali.
Kurse agjencia prestigjoze, Associated Press shkruan se Bllako dhe Lefter Koka rrezikojnë të paktën 15 vite burg.
“Akuzat ndaj Bllakos rrjedhin nga një kontratë koncesioni për nj incenerator mbetjesh në qytetin perëndimor të Fierit, 120 kilometra në jugperëndim të Tiranës. Marrëveshja dyshohet se ka shkaktuar një humbje prej 1.5 milion eurosh për financat publike. Bllako akuzohet për falsifikim dokumentacioni dhe marrje ryshfeti”.
“Në dhjetor, ish-ministri ambientalist socialist, Lefter Koka u arrestua për skandalin e inceneratorit. Të gjithë mohojnë shkeljet. Të dyshuarit përballen me mbi 15 vite burg nëse shpallen fajtorë”.
Shkrimi i AP
Policia shqiptare arrestoi të enjten një deputet të Partisë Socialiste në pushtet me akuzat për korrupsion dhe shpërdorim detyre për një projekt të menaxhimit të mbetjeve, një ditë pasi 9 zyrtarë të tjerë të emëruar nga qeveria u arrestuan për akuza të ngjashme.
Policia tha se akuzat ndaj Alqi Bllakos rrjedhin nga një kontratë koncesioni për një incenerator mbetjesh në qytetin perëndimor të Fierit, 120 kilometra (75 milje) në jugperëndim të kryeqytetit Tiranë. Marrëveshja dyshohet se shkaktoi një humbje prej rreth 1.5 milion Euro (1.7 milion dollarë) për financat publike. Bllako akuzohet për falsifikim dokumentacioni dhe marrje ryshfeti.
Bllako dha dorëheqjen nga mandati i tij në parlament – i cili kishte imunitet nga ndjekja penale – kur akuzat u njoftuan të mërkurën. Ai mohon keqbërjen.
Gjithashtu të mërkurën, policia njoftoi arrestimin e 9 zyrtarëve të tjerë publikë të emëruar nga qeveria për korrupsion të dyshuar në dy raste të koncesioneve të inceneratorëve të mbetjeve.
Në dhjetor, ish-ministri socialist Lefter Koka u arrestua për skandalin e inceneratorit. Të gjithë mohojnë keqbërjen.
Zyra e prokurorit special tha se përveç arrestimeve, janë sekuestruar përkohësisht asetet e dy kompanive dhe rreth 2 milionë euro (2.2 milionë dollarë) pasuri personale dhe asete të lidhura me të dyshuarit.
Kryeministri Edi Rama është zotuar se do të godasë korrupsionin, i cili ka pllakosur Shqipërinë postkomuniste për dekada.
Të dyshuarit përballen me 15 vjet burg nëse shpallen fajtorë.
Opozita kryesore e qendrës së djathtë, Partia Demokratike ka akuzuar qeverinë e majtë të Ramës për pastrim parash dhe korrupsion në dhënien e rreth 430 milionë eurove (480 milionë dollarë) për projektet e djegies së mbeturinave biznesmenëve të lidhur me partinë.
Përpunimi i mbetjeve ka qenë dhe mbetet një shqetësim serioz për Shqipërinë dhe një prioritet kryesor — së bashku me luftën kundër korrupsionit — në përpjekjet e saj për t’u anëtarësuar në Bashkimin Evropian.
