Zëvendësministrja e Bujqësisë dhe Zhvillimit Rural, Ermira Gjeçi deklaroi sot se në 24 orët e fundit nuk ka asnjë rast të ri të konfirmuar nga ISUV, dhe po ashtu asnjë denoncim apo njoftim në numrin e gjelbër.
Gjatë konferencës së përditshme mbi situatën e krijuar nga gripi i shpendëve në vend, Gjeçi tha se po vijon monitorimi i situatës me veterinerët zyrtarë të shërbimit me kontrolle në ferma me drejtim prodhimtari vezë, mishi dhe miks, në të gjithë territorin e Republikës së Shqipërisë.
“Në 24 orët e fundit nuk kemi asnjë rast të ri të konfirmuar, nuk kemi vatra të reja infeksioni, nuk kemi asnjë stabiliment me drejtim prodhim për mish të infektuar, vazhdojmë fushatën sensibilizuese për informimin e fermerëve mbi evidentimin dhe raportimin e rasteve të dyshuara si dhe monitorimin e të gjithë territorit”, deklaroi Gjeçi.
Zv/ministrja garantoi konsumatorin se ushqimet në tregun tonë, në qendrat e licensuara janë të sigurta.
Nga ana tjetër, Ministrja e Bujqësisë dhe Zhvillimit Rural, Frida Krifca zhvilloi sot një takim me kryetarët e bashkive të qarqeve të prekura nga gripi i shpendëve. Ministrja Krifca u kërkoi bashkëpunim për të izoluar dhe asgjësuar rastet. Krifca tha se problemi është izoluar në stabilimente, ndërsa për shpendët e oborrit për shkak edhe të shpërndarjes gjeografike ka akoma situata.
“Këtu nevojitet ti asgjësojmë menjëherë këta shpendë, të bëjmë rrethimin dhe karantinimin dhe në këtë situatë kemi nevojë për bashkëpunimin tuaj”, deklaroi ministrja.
Ministrja po ashtu u kërkoi drejtuesve të bashkive si dhe Policisë Bashkiake një angazhim më të madh për të mos lejuar tregjet që nuk janë të licencuara nga Ministria e Bujqësisë për momentin.
“Nëse nuk marrim masa drastike nuk do të arrijmë të izolojmë këtë sëmundje. Ne jemi të vetëdijshëm për penalitetin që i bëhet industrisë. Është shumë e rëndësishme që ne të veprojmë sot”, tha ajo.
Ministrja tha se, qeverisja vendore duhet të marrë masa për groposjen apo djegien e kadavrave të shpendëve.
