Kryetarja e LSI-së, Monika Kryemadhi kujtoi këtë të Martë se Klodian Zoto ka përfituar rreth 10 mln euro për ndërtimin e landfillit të Vlorës.
Në një njoftim për mediat, Kryemadhi tha se Zoto ka përfituar para publike nga kontrata të ndryshme me institucione publike.
“Në 27 prill të 2020, Klodian Zoto ITS ka marrë 9 milionë e 800 mijë euro për landfillin e Vlorës për të cilin deri më sot ne nuk kemi dëgjuar absolutisht asnjë gjë. Ka qenë e fshehur, e padeklaruar dhe e paprezantuar jo vetëm publikisht por edhe në aspektet e dokumentacionit”, u shpreh kryetarja e LSI-së.
Ajo listoi të tjera kontrata të kompanive të Klodian Zoto-s të lidhura me institucionet publike.
“Në vitin 2016, ka marrë 1 milionë dollarë nga Ministria e Mjedisit, ndërtim i impiantit të pastrimit të grykëderdhjes së Lumit Shkumbin rikualifikimin e vijës bregdetare në Vilë Bashtovë, Rrogozhinë. Ka marrë po ashtu 320 milionë lekë nga Bashkia Rrogozhinë, ka marrë po ashtu 650 milionë lekë nga Bashkia Rrogozhinë përsëri. Ka marrë përsëri nga Ministria e Mjedisit 2 milionë dollarë. Më e bukura ka marrë 6.7 milionë dollarë nga OSHEE për vendosjen e matësave. Më pas, përsëri në 2017 ka marrë nga Ministria e Mjedisit rreth 900 mijë dollarë, ka marrë përsëri nga Bashkia Rrogozhinë 1.5 milionë dollarë, ka marrë përsëri nga OSHEE drejtoria rajonale e Tiranës ndërtimi rrjeti të ri shpërndarës 20KË, 2 milionë dollarë. Ka marrë nga Ministria e Mirëqenies Sociale dhe Rinisë, 1 milionë dollarë për ndërtimin e bazës prodhuese të shkollës ‘Karl Gega’. Dhe përsëri ka marrë 255 mijë dollarë përsëri nga Ministria e Mirëqeniës Sociale”, tha Kryemadhi.
“Pra të nderuar qytetarë, kompania e inceneratorëve e cila e dini shumë mirë që deri me sot ne themi që janë 430 milionë euro, shkon më shumë se 430 milionë euro, shkon përtej. Sepse mos u çudisni kur të na dali dhe nëpër spitale Klodian Zoto me Stela Gugalljan, mos u çudisni kur të dalin në bankat e shkollës nëpër universitete, mos u çudisni kur të dalin në mbjelljen e specave dhe domateve, mos u çudisni kur të dalin në avionët që fluturojnë në qiellin tonë, mos u çudisni kur të dalin në ndonjë konflikt rajonal. E them këtë me ironi sepse çdo hetim nëse do të kishte vërtetësinë e tij, qoftë nga Prokuroria e Posaçme qoftë dhe nga Komisioni Hetimor i Parlamentit që nuk ishte gjë tjetër veçse një zvarritje prej 5 muajsh për të çuar përballë zbardhjen e këtij korrupsioni. Ne do të ishim sot komplet në kushte të tjera”, shtoi ajo.
“Ndërkohë vazhdojmë të kemi kontrata të tjera jashtë fushës së veprimtarisë së inceneratorëve. Ka një kontratë në sipërmarrje me kompaninë ‘Alb Star’ merret dhe me ndërtim rrugësh. Dhe kjo përsëri është bërë në shtator të 2020. Ja ku janë dhe firmat e të dy kompanive. Pra të nderuar qytetarë ne do të vazhdojmë të zbardhim dhe më tej këtë grup të strukturuar kriminal. Sepse shumë njerëz vazhdojnë jo vetëm të ndihmojnë në zbardhjen e kësaj çështjeje por sot qytetarët janë mëse të bindur dhe janë të koshientë në atë çfarë po ndodh. Sepse qeveria vazhdon dhe paguan në vit pandemie me miliona euro për përveç inceneratorëve dhe me ndërtime shkollash të cilat nuk po i shikojmë sepse shkollat po boshatisën çdo ditë dhe më shumë, apo me riparime rrugësh apo me pastrime kanalesh vetëm për Klodian Zoton. Dhe ajo që dua të theksoj është që sot qytetarët kur flitet për të marrë rimbursime për çmimet e larta nuk mundet dot të marrin as njëmijë lekë të vjetra”, denoncoi më tej Kryemadhi.
Kryetarja e LSI-së paralajmëroi se do të bëjë publike provat të cilat tregojnë se si “paratë e inceneratorëve” të ardhura nga Malta janë përdorur në mënyrë masive për blerjen e votave në qarkun e Durrësit për zgjedhjet e 25 Prillit.
“Përpara një viti kam denoncuar se do vinin nga Malta, paratë e inceneratorit për t’u përdorur në zgjedhjet e 25 prillit të vitit të kaluar. Shumë shpejt do njiheni me atë dosje. Ato para janë përdorur në mënyrë masive për blerje vote në qarkun e Durrësit”, përfundoi Kryemadhi.
Klodian Zoto është në kërkim për dosjet hetimore të inceneratorit të Elbasanit dhe Fierit.
/BN/
