Presidenti Ilir Meta ka mirëpritur në një takim në Presidencë, studentë të Universitetit të Durrësit.
Meta ndau mesazhe të rëndësishme me studentët, duke thënë se liria kurrë nuk duhet marrë si e mirëqënë, andaj ajo duhet të mbrohet me çdo kusht.
Postimi i presidentit Ilir Meta:
Mirëprita sot, më kërkesë të tyre, një grup studentësh të Universitetit të Durrësit “Aleksandër Moisiu”, të cilët ndjekin kurset master në degët e juridikut, marrëdhënieve ndërkombëtare dhe shkencave politike.
Në bashkëbisedimin e hapur në kontekstin e zhvillimeve të fundit, theksova rëndësinë e ndaljes së agresionit rus dhe luftës në Ukrainë dhe arritjes së më parë të një marrëveshjeje përmes dialogut dhe diplomacisë.
Demokracia është arma më e mirë për të siguruar paqe, mirëqenie dhe zhvillim për popujt, ndaj sa më shumë forcohet demokracia aq më shumë parandalohen konfliktet.
Nuk duhet të harrojmë se liria nuk duhet marrë kurrë si e mirëqenë. As si dhuratë. Por ajo duhet mbrojtur në çdo kohë.
Vlerësova rëndësinë e gazjellësit TAP për sigurinë energjitike të Europës, projekt që rrit ndjeshëm pavarësinë nga gazi rus.
TAP është investimi i huaj më i rëndësishëm strategjik në vendin tonë.
Falë TAP-it, Shqipëria luan një rol të rëndësishëm në infrastrukturën energjetike strategjike europiane dhe ne duhet të krenohemi për këtë.
