Nga Boldnews.al
Partia Socialiste, nëpërmjet Kreut të Grupit Parlamentar, Taulant Balla, u shpreh e gatshme t’i “hapë rrugë drejtësisë”, duke paralajmëruar në këtë mënyrë dhënien e autorizimit për arrestimin e deputetit të saj, Alqi Bllako.
Këshilli i Mandateve dhe Imuniteteve në Parlamentin e Shqipërisë është njoftuar për të diskutuar pasditen e së Mërkurës mbi kërkesën e Strukturës së Posaçme Kundër Korrupsionit (SPAK).
Ka më shumë se një arsye, përtej shkeljeve ligjore, për të cilat Alqi Bllako me shumë mundësi do t’i bashkohet në qeli ish-shefit të tij në Ministrinë e Mjedisit, Lefter Koka.
Bllako është një prurje e re në Partinë Socialiste, pasi më herët ka qenë pjesë e Partisë Demokratike dhe Lëvizjes Socialiste për Integrim.
Ai u zgjodh deputet i Socialistëve në zgjedhjet e përgjithshme të 25 Prillit dhe për opozitën, mandati i tij u vendos nga “blerja e votave”, pavarësisht se askush nuk paraqiti fakte konkrete për këto akuza.
Bllako ka pasur një rol thelbësor në procedurat e inceneratorëve, por gjithnjë në pozicion dytësor, pas Kokës, por edhe ministrave të tjerë të fuqishëm të qeverisë “Rama”, përfshirë Arben Ahmetajn e Damian Gjiknurin.
Duket se emri i Bllakos është një lloj sigurese, djegia e të cilit mund të shpëtojë makinerinë e rrezikur, e cila e ka zemrën tek kryeministri Edi Rama dhe Sekretari i tij i Përgjithshëm, Engjëll Agaçi.
Alqi Bllako nuk ka mbështetje të fuqishme politike dhe ai përfitoi pozicion të mirë në listën e kandidatëve për deputetë në Tiranë për faktin e vetëm se ishte treguar i bindur të ndiqte procedurat e ‘aferës së inceneratorëve”.
Tashmë që skandalit i doli tymi, Bllako mendohet se është “shënjestra perfektë”, e cila goditet më lehtë.
Aq e vërtetë është kjo, sa edhe SPAK-u, në kërkesën drejtuar Parlamentit për të marrë autorizimin për arrestimin e tij, nuk është lodhur të bëjë asnjë analizë ligjore.
Në Relacionin prej 20 faqesh, si edhe në Kërkesën për Dhënie Autorizimi, SPAK-u ka bërë një renditje faktesh, përfshirë edhe dyshimet e saj për përfshirjen e Bllakos në veprimtari korruptive dhe shpërdorim detyre.
Megjithatë, në dokumentat që SPAK-u i drejton Parlamentit, nuk lexohet në asnjë rresht se për cilën arsye kërkohet autorizimi për arrestimin e tij.
Të paktën, formalisht, SPAK-u duhet të rendiste arsyet se përse mendon që arrestimi i Bllakos është alternativa më e mirë në rastin e tij.
Minimalisht, SPAK-u duhet të argumentonte se përse Bllako rrezikon provat, rrezikon ikjen apo mund të intimidojë dëshmitarët, të cilat përbëjnë arsyet kryesore proceduriale për caktimin e masës së sigurisë “arrest me burg”.
Natyrisht, dyshimet që ngrihen mbi Alqi Bllakon janë të rënda dhe ai, më së paku, duhet të ndjekë procesin në qeli. Por, për organin procedues, prokurorinë, argumentat e plotë ligjorë janë detyrim, aq më tepër kur kërkesa e saj do të shqyrtohet nga një panel politik në Këshillin e Mandateve dhe Imuniteteve.
Kërkesa e SPAK-ut duket formale, duke forcuar edhe më tej dyshimet se Alqi Bllako ishte një “kartë e djegur” më herët dhe se goditja e tij është e koordinuar edhe me partinë politike, në të cilën ai militon.
