Vllaznia do të shkojë me organikë të plotë ndaj Partizanit. Me ekipin janë kthyer në stërvitje të gjithë të dëmtuarit, ndërsa i vetmi lojtar, që ka shfaqur disa shqetësime të vogla është Ardit Krymi, i cili nuk është ende plotësisht i gatshëm.
Mesfushori është një nga pikat kyçe të skuadrës dhe stafi mjekësor po bën maksimumin ta rikuperojë dhe ta vendosë në dispozicion të Plorit për ndeshjen e së mërkurës me “demat”.
Po ashtu, kapiteni Gurishta, pavarësisht se stërvitet me ekipin, sërish nuk duket plotësisht i gatshëm. Megjithatë, gjendja e mbrojtësit është më e mirë se e Krymit dhe ka shumë shanse të jetë në fushë në gjysmëfinalen e parë të Kupës.
Edhe në seancën e djeshme janë parë të stërviten normalisht me ekipin edhe dyshja Latifi e Da Silva. Latifi, i cili ka pasur një problem muskulor, duket se është shëruar plotësisht dhe do të jetë në gatishmëri për “demat”, teksa me shumë mundësi do ta nisë nga nisë nga minuta e parë. Edhe për Da Silvën shanset që ta nisë titullar, janë të mëdha.
Ky është një lajm shumë i mirë për trajnerin Plori, duke ditur rolin dhe vlerat e këtyre dy futbollistëve. Latifi është njëkohësisht edhe golashënuesi më i mirë i skuadrës shkodrane për këtë sezon.
Po ashtu, edhe rikthimi i Da Silvës rrit më tepër forcën sulmuese të kuqebluve duke mos harruar që me ekipin po stërvitet edhe gjysmësulmuesi tjetër, Ardit Hoxhaj, i cili prej muajsh qëndron jashtë fushave për shkak dëmtimi.
Sulmuesi nga Vlora shkëlqeu në sezonin që shkoi, por dëmtimet e kanë penguar shumë në këtë vit. Së fundi, ai është rikthyer sërish në stërvitje dhe duket se i ka lënë pas njëherë e mirë problemet fizike që ka pasur.
Vllaznia ka nevoje emergjente për lojtarë si Latifi dhe Da Silva për shkak se ata janë një fuqi e madhe në sulm. Është parë qartë se në ndeshjet kur ato kanë munguar, Vllaznia e ka humbur rrugën për te goli.
