Ivi Kaso, përfaqësuesi ligjor i Komisionit të Rithemelimit, ka sqaruar vendimin e gjykatës së Tiranës që njohu Kuvendin e PD-së, mbajtur në 11 Dhjetor në “Air Albania”.
Në një prononcim për gazetarët jashtë ambienteve të gjykatës, Kaso tha se gjykata vendosi regjistrimin e statutit të Kuvendit të 11 Dhjetorit, simboleve të reja që u bënë me dije gjatë kuvendit si dhe gjithë vendimeve që u morën në 11 Dhjetor.
“Tanimë edhe juridikisht selia e PD-së do të drejtohet nga Komisioni i Rithemelimit”, deklaroi Kaso pas vendimit të gjykatës.
“S’mundet kush të mos ekzekutojë këtë vendim, çdo organ zyrtar i Republikës së Shqipërisë njihet me faktin se kush është organi më i lartë drejtues i PD që është Komisioni i Rithemelimit, cila është sigla dhe vula e PD”, tha Kaso .
Ai tha se vendimi është i paankimueshëm. “Vendimi mund të ankimohet vetëm nga pala jonë, meqë kërkesa jonë u pranua, ne s’kemi pse ta ankimojmë”, deklaroi ai.
I pyetur nga gazetarët se çfarë ndodh nëse gjykata merr një tjetër vendim për njohjen e Kuvendit të 18 Dhjetorit, thirrur nga Lulzim Basha, Kaso shpjegoi pse sipas tij, kjo nuk mund të ndodhë.
Kaso tha se një nga vendimet e Kuvendit të 11 Dhjetorit ishte anulimi i thirrjes së Kuvendit të 18 Dhjetorit, kështu që ky kuvend cilësohet i paligjshëm.
“Gjykata sot mori vendimin e paralajmëruar nga ana jonë në 11 Dhjetor kur u mbajt kuvendi i vërtetë i demokratëve dhe vendosi tu kthejë demokratëve selinë, siglën dhe simbolet e mbajtura peng”, u shpreh po ashtu Ivi Kaso. “Vendimmarrja (e gjykatës) ishte e vonuar për sa i përket afateve procedurale se duhet të ishte marrë brenda një muaj, por në këtë rast vlen shprehja më mirë vonë sesa kurrë”, shtoi ai më tej.
“Që nga 11 Dhjetori ka vetëm një PD është ajo që përfaqësohet nga Komisioni i Rithemelimit, ju pëlqen apo jo atyre që bëjnë tymnajë”, theksoi Kaso.
