Deputetja Albana Vokshi u shpreh sot nga salla e Parlamentit se shqiptarët jetojnë në një regjim, ku jetesën e tyre ia përcakton Edi Rama.
“Edi Rama ju cakton ku do jetojnë, Edi Rama zgjedh banesat që do të shemben, Edi Rama ju thotë ku duhet të jetoni, në banesa me qira apo në ato tuajat, asnjë ligj nuk respektohet, shkelet Kushtetuta, dhe kjo është gjuha e vërtetë e qeverisjes së Edi Ramës”, tha Vokshi, duke folur në Parlament për shembjen e banesave në zonën e 5 majit, Paskuqanit apo Laprakës.
Vokshi tha se në emër të kujt shemben këto banesa pa iu dhënë mundësinë qytetarëve as të njihen me shkresat. “Si shkon IKMT me fadroma, pa asnjë copë letër dhe shemb banesat. Në emër të kujt bëhen këto? Në emër të grabitjes, qytetarëve po i grabiten pronat. Nga mbi 490 mijë metra katror, për banesat do të përdoren 165 mijë metra katror, atëherë kush po ia grabit pronat qytetarëve”, tha Vokshi.
Deputetja demokrate thumboi edhe diplomatët, që sipas saj, reagojnë për gjithçka, por nuk reagojnë kur pronat e shqiptarëve grabiten nga regjimi i Edi Ramës.
“Nuk i keni lënë ata qytetarë as të marrin plaçkat, nuk keni pyetur as për të moshuarit që janë tërhequr zvarrë nga policia, kush ua jep të drejtën juve të nxirrni pronarët nga shtëpitë e tyre, tua shembni banesat, ndërkohë që nuk ka asnjë plan, se çfarë do të ndërtohet, apo se çfarë projekti ka? A keni menduar që në ato banesa mund të jetojnë edhe 2 apo 3 kurora, ndërkohë që nuk i kompensoni, nuk i jepni asnjë zgjidhje ku të fusin kokën”, tha Vokshi.
Duke iu drejtuar mazhorancës, Vokshi tha se asnjë prej jush nuk do të firmoste marrëveshje të tilla, ku i merrni pronarëve 500 apo 600 metra banesë dhe truall dhe nuk i kompensoni aq sa i merrni.
“Pse nuk shkoni të takoni ato banorët aty në Laprakë, Paskuqan apo te 5 Maji? Unë një gjë do ju them se ndaj këtij regjimi askush nuk do të shpëtojë, pasi ju shkelni ligje dhe Kushtetutë dhe në çdo kohë mund të trokisni në dyert e banesave të secilit nga ne, dhe të na nxirrni jashtë, dhe të na shembni banesat”, tha Vokshi.
Deputetja tha se janë shkelur disa nene të Kushtetutës që lidhen me të drejtën e pronës, ndërsa shtoi se ata banorë nuk duan lëmoshë, por duan dëmshpërblim të drejtë, duan dinjitet.
“Jemi në një regjim, regjimet rrëzohen me protesta, mos heshtni, ngrihuni dhe mbroni të drejtat tuaja”, tha Vokshi.
