Kjo e Martë shënon ditën e 27-të luftës në Ukrainë.
Më herët gjatë ditës, presidenti ukrainas, Volodymyr Zelensky mbajti një fjalim përmes një video-lidhjeje me deputetë italianë, të cilëve iu tha: “Ne jemi në prag të mbijetesës”.
Zelensky bisedoi edhe me Papa Françeskun dhe sugjeroi që Vatikani mund të luajë rol ndërmjetësues në përfundimin e luftës.
Kryetari i qytetit Borispill, pranë Kievit, u tha banorëve që “të largohen sa më parë që është e mundur”, pasi luftimet me forcat ruse janë duke u afruar.
Mbi 15,000 ushtarë rusë janë vrarë që nga fillimi i luftës në Ukrainë, tha Ministria e Mbrojtjes e Ukrainës.
Presidenti i Shteteve të Bashkuara, Joe Biden, tha se presidenti rus, Vladimir Putin, mund të jetë duke u përgatitur për përdorimin e armëve kimike dhe biologjike në Ukrainë.
Forcat ruse duket se janë “bllokuar në vend”, tha Ministria e Mbrojtjes e Mbretërisë së Bashkuar, derisa forcat ukrainase “vazhdojnë t’i zmbrapsin” përpjekjet e tyre për të pushtuar qytetin jugor të Mariupolit.
