Vllaznia u mposht 3-0 në transfertë nga Egnatia për javën e 26 të Superligës. Sfida pa një Vllazni të dobët në prapavijë, ndërsa telashet veç humbjes trajnerit Plori ia shtoi edhe Heric. Mesfushori u ndëshkua me karton të kuq, duke lënë skuadrën për shumë minuta me një lojtar më pak.
Tanimë Heric do jetë mungesë për sfidën e radhës në kampionat, atë kundër Kastriotit që luhet në 3 prill. Përpara këtij dueli, shkodranët luajnë me Partizanin në Kupën e Shqipërisë, sfidë e rendësishme për objektivin Europë.
Me tre vendet e para në Superligë që janë “të zëna”, Vllaznia kërkon të dalë fituese në Kupë për të prenotuar një vend në Kupat e Evropës. Telashet për trajnerin Elvis Plori vijnë edhe nga infermieria, aty ku Da Silva, Gurishta dhe Jonuzi vijojnë me probleme.
Pauza e Kombëtares duket se do sjellë edhe riaftësimin e tyre, me kampin shkodran që shpreson të ketë grupin të plotë.
