Ish-komandanti i trupave të KFOR-it në Kosovë më 1999, Mike Jackson që ishte edhe komandanti i parë i trupave të NATO-s, nuk ka përjashtuar mundësinë që konflikti në Ukrainë të sjellë deri edhe Luftën e Tretë Botërore.
Gjenerali Sir Mike Jackson, njëherësh ish-kreu i ushtrisë britanike, theksoi se pushtimi rus në Ukrainë, e ka futur botën në një terror të pashembullt.
Sir Mike, që drejtoi ushtrinë gjatë ndërhyrjes ushtarake në Irak gjatë vitit 2013, bëri me dije se veprimet e Moskës nënkuptojnë se rreziku i vendosjes së armëve bërthamore është rritur në mënyrë proporcionale.
Kremlini dhe anëtarët e aleancës së NATO-s, përfshirë Mbretërinë e Bashkuar dhe Shtetet e Bashkuara, posedojnë raketa bërthamore. 77-vjeçari u pyet për mediat e huaja nëse konflikti në Ukrainë mund të çojë në Luftë të Tretë Botërore.
“Situata është shumë delikate në kuptimin perëndim-lindje dhe të ardhmen e saj. Është një territor i paeksploruar. Falë Zotit nuk kemi parë përdorim të armëve bërthamore që nga viti 1945”, ka thënë gjenerali i pensionuar britanik. Ai shtoi se sërish nuk mund të jemi të sigurt se mund të kalojmë këtë shekull, pa përdorim të armëve bërthamore.
Mike Jackson ka qenë komandanti i parë i forcave të NATO-s në Kosovë dhe nënshkruesi i marrëveshjes së Kumanovës, kur forcat serbe u detyruan të largohen nga vendi.
