Deputeti Agron Gjekmarkaj ka komentuar zhvillimet e fundit në Partinë Demokratike, ndërsa ka shpjeguar qëndrimin e tij për largimin nga funksionet, Gjekmarkaj tha se në mbledhjen e fundit të grupit parlamentar, shumica e deputetëve kanë kërkuar dorëheqjen e kryetarit Lulzim Basha.
“Sa i përket mbledhjes ka patur debat normal për kushtet ku jemi, ku shumica e deputeteve të PD, disa i kanë kërkuar Bashës hap pas dhe disa dorëheqjen e pakushtëzuar”, është shprehur Gjekmarkaj.
I pyetur nga gazetari Blendi Fevziu, se çfarë nënkuptohet me hap pas kur në politikë kërkohen hapat përpara, Gjekmarkaj tha “në politikë ecën para drejt fitores, por kur fitorja nuk vjen do të thotë të lejosh hapësira për një lidership të ri”.
Ndrkohë lidhur me kërkesën e disa deputetëve që dorëheqja e Bashës të shoqërohet me hap pas edhe nga ana e Berishës, ai u shpreh se është e vështirë të kushtëzohet zoti Berisha, për sa kohë është përjashtuar nga strukturat e partisë.
“Në fakt që të jem i ndershëm me ju dhe ata që na shohin, unë personalisht në rrafshin e mbajtjes përgjegjësi, ashtu siç mbajta vetë i kam kërkuar zotit Basha të mbajë përgjegjesi. Eshtë pak e vështire ta kondicionosh zotin Berisha në momentin kur e ke përjashtuar pas 8 Janarit. Nga pikëpamja teknike, demokracia ka procedurë. Ai ka një parti tjetër që është “Shtëpia e lirisë”. Pastaj nëse ka vullnet politik për bashkim e gjëra të tjera, kjo është gjë tjetër, por në këtë moment nuk ke çfarë i kërkon atij sepse ai është një parti tjetër. Sjellja e zotit Basha duhet të jetë sjellje që kushtëzohet nga raportet e brendshme me njerëzit dhe pritshmëritë e publikut nga PD”, u shpreh Gjekmarkaj.
