Genc Sejko ka ironizuar me kryeministrin Edi Rama, pas arrestimit të këngëtares Elsa Lila.
“Edo?!! Si është e mundur që e gjithë shoqëria jote merret me drogë? Vetëm ti ke shpëtu”, shkruan Sejko në një postim në FB, ku publikon dhe një foto të këngëtares e cila pozon duke përqafuar kryeministrin Edi Rama.
Mediat italiane raportuan këtë të Mërkurë se Elsa Lila ishte pjesë e një grupi që mërej me trafik droge në Romë. Sipas “Corriere della Sera”, 41-vjeçarja ishte llogaritarja e grupit dhe u arrestua mëngjesin e sotëm bashkë me tetë persona të tjerë.
Këngëtarja është përfshirë në politikë vite më parë, kur Partia Socialiste asokohe në opozitë hyri në grevën e urisë në çadrën para Kryeministrisë. Elsa Lila, në vitin 2010, iu bashkua deputetëve në grevën e urisë, ku ka bërë thirrje që qytetarët të mbështesnin Partinë Socialiste në kërkesën për hapjen e kutive të zgjedhjeve të 2009-ës.
Elsa Lila ka pozuar disa herë krah Edi Ramës, i cili në vitin 2013 publikoi një foto me këngëtaren duke u përqafuar dhe ku shpjegonte se ajo erdhi nga Italia për të votuar “Rilindjen”.
E ëma e këngëtares, violinistja Eva Vishaj, është vrarë në rrethana të paqarta në vitin 1997 në aksin Tiranë-Elbasan.
Sipas raportimeve mediatike, Elsa është nënë e një vajze 10-vjeçare.
