Ai tha sot se “Ballkani i Hapur” funksionoi, ndërsa shtoi se Serbia liroi vetëm sasinë e grurit të kontraktuar nga Shqipëria.
Në një takim me përfaqësues të biznesit të vogël, Rama deklaroi se “prej shumë vitesh gruri është një produkt të cilin kompanitë shqiptare e importojnë”.
“Kishim një problem deri para ca ditësh me kompanitë për shkak se 20 mijë tonë të kontraktuara në Serbi ishin pjesë e bllokimit të përgjithshëm që Serbia i bëri eksporteve të veta. Ato 20 mijë tonë, nëse nuk do të vinin, do të krijonin problem zëvendësimi të sasisë dhe problem çmimi shumë të rëndë”, tha Rama.
Kryeministri shtoi se “ky është rasti për të dhënë një shembull se çfarë është ‘Ballkani i Hapur’ dhe çfarë do të thotë të krijosh marrëdhënie në funksion të ekonomisë, njerëzve e lëvizjes së mallrave”.
“‘Ballkani i Hapur’ funksionoi në këtë rast, pikërisht sepse Serbia liroi vetëm sasinë për Shqipërinë. Ministrja e Bujqësisë ka disa ditë që merret me këtë”, tha Rama.
Lidhur me furnizimin me miell, Rama tha se “ne nuk kemi problem furnizimin”.
“Sfida jonë është të mos lejojmë që çmimi të reflektohet pastaj në rritje eksponenciale të çmimit të bukës. Nga pikëpamja e furnizimit ne nuk shikojmë problem në horizont”, shtoi Rama.
Kryeministrit iu kërkua të braktiste nismën “Ballkani i Hapur” pas qëndrimit që mbajti Serbia në lidhje me konfliktin Ukrainë-Rusi (duke mos vendosur sanksione ndaj Rusisë). Rama, nga ana tjetër, ka mbrojtur nismën.
