Ish-kryeministri Sali Berisha ishte sot në Elbasan, nga ku tha se mesazhi më i shkëlqyer në këtë ditë është bashkimi i demokratëve.
Berisha uroi Ditën e Verës.
Ai iu përgjigj edhe interesit të gazetarëve lidhur me deputetët që kanë kërkuar distancimin e tij nga PD.
“Uroj që për shqiptarët, kjo ditë të sjellë ndërrimin e madh që ata presim me padurim – ndërrimin e narkoshtetit dhe rivendosjen e shtetit ligjor. Përzemërsisht, një urim kam për ata qindra mijëra qytetarë shqiptarë që kanë mbushur gjatë këtyre ditëve rrugët e sheshet e qyteteve të vendit për të protestuar kundër një politike cinike të pashpirt, e cila përdor si pretekst hijet e luftës në Ukrainë për të justifikuar rritjen dramatike absolutisht të pajustifikuar të çmimeve të produkteve më jetike të qytetarëve shqiptarë”, tha Berisha në një prononcim për gazetarët.
Do jetë kjo pranvera e ribashkimit në PD?
“Kjo do jetë pranvere e përpjekjeve të mëdha të demokracisë për ngadhënjimin e saj. Dhe absolutisht, mesazhi më i shkëlqyer është bashkimi i demokratëve rreth votës së lirë dhe idealeve të tyre të lirisë”, u përgjigj Berisha.
Nga ata që kërkojnë largimin e Berishës, ata që kanë qenë pranë Bashës, a do sakrifikoheshit për ideal të PD-së?
“S’po mbroj asgjë tjetër veç votës së lirë. Ka një përpjekje për të stisur një përballje mes votës së lirë dhe bllofit, por atyre që e bëjnë do u lëmë blofin në dorë”, tha Berisha.
