Napoli mposhti Veronën me dygolëshin e shënuar nga Osimhen, ndërsa vazhdon të mbajë hapin e Milanit në Seria A.
Pas fitores 2-1, trajneri Luciano Spalleti u shfaq shumë i lumtur, ndërsa theksoi se pas humbjes me Milanin një javë më parë e kishte shumë të vështirë të motivonte lojtarët.
“Kemi bërë gjithçka që duhet të bënim. Kemi bërë një ndeshje ku ishim shumë të vëmendshëm dhe kishim vazhdimësi. Verona nga ana tjetër tha fjalën e saj përgjatë ndeshjes, me mënyrën e lojës, kualitetin që kanë dhe teknikën. Sot duhet t’i bëjmë komplimente lojtarëve të Napolit, e kanë merituar fitoren”.
Më pas ai u ndal edhe te pjesa se sa të rëndësishme janë sfidat e ardhshme: “Pres që këtë reagim nga ekipi gjithmonë. Unë thashë se një humbje e mundshme do të ishte fatale. Gjithçka mund të ndodhë ende, ne mund të luftojmë për kampionatin. Edhe ekipet që janë përpara nesh mund të humbasin në vazhdim”.
Më pas ai analizoi edhe stilin e lojës së Napolit: Për të krijuar më shumë presion duhet të sillnim më lartë dy mesfushorët e qendrës. Zgjodhëm ta bënim këtë dhe në shumë raste e kemi bërë me një mesfushor qendre dhe një nga trekuartistët për të shkuar përpara mbrojtjes së tyre me pesë lojtarë. Kanë zhvilluar një ndeshje perfekte, dhe duhet të nënvizoj edhe karakterin që ata kanë”, ka theksuar Spalletti.
