Adriatik Lapaj tha mbrëmjen e sotme në emisionin “Zonë e Lirë” se çmimet e ushqimeve janë rritur nga 20-30 %, shërbimet me 20 % dhe karburantet me mbi 40 %.
Sipas tij, kjo është arsyeja që sot qytetarët po protestojnë në Tiranë dhe shumë qytete të vendit.
“Qytetarët nuk mund të përballojnë jetesën me çmimet që janë sot, por që rritja ka nisur që prej muajit tetor”, tha Lapaj.
Ai tha se Shqipëria prodhon mbi 7 mijë fuçi për 1 mln banorë, prodhojmë më shumë se 1 mln ton në vit, ndërsa shpenzojmë 600 apo 700 ton në vit.
“Në vend që të ishim një vend që do të fitonim nga nafta, ne jemi një vend ku nafta ka çmimin më të lartë. Qeveria sot arkëton 1300 lekë për litër nga nafta, ndërkohë që xhepat e qytetarëve zbrazen, pasi nga nafta ka një reaksion zinxhir përsa i takon rritjes së çmimeve”, tha Lapaj.
Sipas tij, Kryeministri deklaroi se Qeveria nuk mund të ndërhynte në treg, ndërsa sot tha se Qeveria mund të ndërhyjë lidhur me çmimet. Ai tha se sa herë Edi Rama është në hall, del dhe fyen, tallet, akuzon dhe sulmon ata që protestojnë.
“Ata qytetarë dalin në protesta jo për hallin e njërit apo tjetrit, sikundër shprehet Rama, por dalin për hallin e tyre, për fëmijët e tyre, pasi nuk përballohet më jetesa”, tha Lapaj.
