Nga Boldnews.al
Siguri që çmimet do bien nuk ka, por në këtë mesele një gjë është mëse e sigurt, si kryeministri Edi Rama ashtu edhe ministrat e tij nuk janë prekur personalisht nga kriza. Nuk kanë as merakun si të mbyllin muajin. Nuk dinë as çfarë është të shkosh në një pikë karburanti, marketi, apo tregu të fruta-perimeve. Nafta ka kapur çdo rekord historik, duke shkuar deri në 270 lekë për litër, prej të vilave 120 lekë na e merr qeveria si taksë, akcizë dhe TVSH.
Asnjë masë nuk është marrë deri më tani, duke mos i ngjarë as Kosovës dhe Maqedonisë së Veriut që po subvencionon çmimin e rritur dhe ka hartuar një paketë fnaciare për tu ardhur në ndihmë shtresave në nevojë. Pikërisht në dilën kur çmimet e karburanteve dhe çdo produkti tjetër fluturoi në rritje, edhe Rama fluturoi në avion bashkë me pesë ministra në Dubain e sheikëve, të qejfit dhe luksit.
E justifikuan se shkuan për një aktivitet të rëndësishëm që ka të bëjë me “turizmin”, ku për “turizëm” do të fliste edhe Ministri i Bredshëm, Çuçi Bled i Ramës… Ironi, malinjitet më të madh dhe sfidë për qytetarët nuk mund të ketë më shumë se kaq. Por Rama duket se nuk po din të shohë mllefin qytetar, që më shumë se të ankohen për çmimet nuk po durojnë indiferencën, talljen dhe botën virtuale të qeverisë që e shet si realitet ëndrrash.
Dita e protestës ishte dje, është sot, duket se do jetë edhe në vijim. Ata qytetarë që kanë një makinë duhet të zbresin prej saj dhe ti hipin qeverisë, jo në kurriz, por në trotuarin përballë kryeministrisë dhe çdo ministrie tjetër. Të ndjekin udhëzimet me përpikmëri të Ministres së Infrastrukturës dhe Energjitikës Belinda Balluku, e cila tha se qytetarët duhet të lenë makinat dhe të ecin në këmbë. Ka botë kjo ministre, në këtë rast duhet dëgjuar.
Ashtu në këmbë të gjithë që janë prekur jo vetëm nga rritja e çmimit, por rritja e mendjes së kabinetit qeveritar kanë nevojë për protestë. Pa dhunë qoftë ajo, sepse dhunën e ka atribut qeveria, nga policë pushteti që u hanë duart, u zien gjaku kur shohin qytetarë protestues dhe mbajnë gati bombat me gazin lotsjellës. Po sikur të jetë rritur edhe çmimi i bombave me gaz lotsjellës? Mos ketë merak asnjë qytetar se sado të rritet çmimi qeveria do i blejë, qoftë edhe duke futur para nga xhepat e tyre… Po edhe nëse nuk janë mësuar të fusin duart në xhepat e tyre, do gjejnë një zgjidhje, duke subvensionuar çmimin e gazit lotsjellës.
Ka edhe një formë që ta sigurojnë falas nga Serbia, mbase një telefonatë e gjatë me mikun Vuçiç mund të mundësojë drithra për tre muajt e ardhshëm dhe gaz lotsjellës për tre vitet e ardhshme. Pavarësisht se bombat me gaz kanë nisur të dalin nga magazinat e policisë, ndoshta duke i “hipur qeverisë” ajo do reflektojë, madje mund t’i pelqejë kjo formë, për të zbritur nga ajri edhe mendor dhe të shohë realitetin e frikshëm, që nuk përkthehet vetëm në vota, (të blera lirë e apo shtrenjt). Po një votë sa ka shkuar, a do të rritet ajo bashkë me indeksin e çmimeve? Kjo e fundit është halli i vërtetë i qeverisë, pasi me naftën na e ka bërë naftën.
