Profesori Ervin Goci, ishte një nga folësit në protestën qytetare që po organizohet përpara godinës së Kryeministrisë, kundër rritjes së çmimeve.
Goci ka kërkuar dorëheqjen e Belinda Ballukut nga posti i ministres së Energjitikës dhe Infrastrukturës pas deklaratave të turpshme që ajo bëri një ditë më parë duke këshilluar qytetarët që të mos përdorin makinat edhe kur blenë një paketë cigare apo një bukë.
Goci tha se Qeveria duhet të ndërhyjë, pasi është detyrë e saj për të mbrojtur qytetarët, në të kundërt nuk ka pse të na duhet një qeveri e tillë.
“Të gjithë bashkë ne mund ta rrëzojmë këtë regjim, ndaj nesër sërisht në orën 17:00 të mblidhemi dhe të protestojmë”, tha Goci.
Ai theksoi se zgjidhja nuk është protesta e sotme apo ulja e çmimeve, por dorëheqja e menjëhershme e ministrave të linjës, deri në krijimin e hapësirave për lirinë ekonomike për të gjithë qytetarët.
Ai ju bëri thirrje bujqve, ekonomistëve, sipërmarrësve dhe çdo shqiptari që të bllokojnë çdo hapësirë ku marrin frymë oligarkët.
‘Përgjysmimi i urbanëve është masë kriminale. Unë sot doja të thoja diçka që po anashkalohet. Unë nuk flas në të ardhme, flas për këtë që po ndodh, ne prej disa muajsh kemi marrë pasoja nga rritja e çmimeve. Unë dal në protestë për të kërkuar përgjegjësi.
Unë kërkoj dorëheqjen e ministres së Energjetikës apo ministrive të linjës, sepse unë dëmin e kam marrë në çdo sekondë, unë jam duke i dhënë para oligarkëve.
Zgjidhja është bllokim total në çdo centimetër të Shqipërisë, të gjithë që preken direkt apo indirekt të bllokojnë çdo centimetër të territorit, duhet ndryshuar çdo sektor ekonomik”, deklaroi Goci.
Protesta në Tiranë dhe në Durrës janë mbajtur në një kohë kur në pikat me pakicë të tregtimit të karburanteve, çmimi i naftës u tregtua me 275 lekë për litër, ndërkohë që Edi Rama paralajmëron rritje në vazhdim, për shkak të luftës në Ukrainë.
Qytetarët paralajmëruan përshkallëzim të protestave, nëse qeveria nuk ndërhyn me urgjencë duke ulur taksat për litër karburant.
