Ish-ministri i Mjedisit Lefter Koka, që prej 3 muajsh mbahet në qeli për aferën e inceneratorëve, ka bërë rekurs në Gjykatën e Lartë, duke kërkuar për veten një masë më të butë të sigurisë.
Rekursi për të ndryshuar masën e sigurisë në Gjykatën e Lartë është bërë më datë 7 mars.
Më 14 dhjetor SPAK urdhëroi prangosjen ish-ministrit të Mjedisit, Lefter Koka për dosjen e shumëpërfolur, atë të inceneratorit në Elbasan. Prokuroria e Posaçme akuzon ish-ministrin e Mjedisit për tre vepra penale.
Ndaj tij rëndojnë akuzat e “shpërdorimit të detyrës”, “pastrimit të parave” dhe “korrupsionit”.
Hetimet disa mujore zbuluan se Lefter Koka favorizoi pronarët dhe administratorët e kompanisë lidhur me koncesionin e inceneratorit të Elbasanit.
SPAK akuzoi se Koka ka përfituar rryshfet në vlerën e 3.7 milion eurove nëpërmjet kompanive fiktive të zotëruara nga familjarë dhe të afërmve të tij.
