Nënat ruse, të zemëruara kanë akuzuar presidentin rus Vladimir Putin se ka përdorur djemtë e tyre si “mish për top”.
Këtë deklaratë, nënat ruse, e kanë dhënë, pas asaj që po ndodh në Ukrainë. Në një video të publikuar në mediat më në zë të botës, shihet teksa përplasen nënat ruse me guvernatorin rajonal.
Në këtë ditë, policia ruse arrestoi jo pak, por mbi 4 500 persona, për protesta kundër luftës në territorin e Ukrainës.
Sergei Tsivilev, guvernatori i rajonit Kuzbass në Siberi qëndroi para nënave të ushtarëve që akuzuan Kremlinin për mashtrim.
“Të gjithë u mashtruam. Ata u dërguan atje si mish për top”, bërtiti një grua. “Ata janë të rinj. Ata ishin të papërgatitur”. Ndërsa Tsivilev, duke mërmëritur, u përpoq ta paraqiste pushtimin e Putinit në Ukrainë si një “operacion special” dhe jo si luftë, gratë i bërtisnin atij.
“Ky është një operacion special dhe për momentin askush nuk mund të komentojë për operacionin special”, tha ai.
“Janë përdorur!” e ndërpreu një nënë. “Pra, fëmijët tanë janë shfrytëzuar?” pyeti ajo. Nga videoja nuk është e qartë se kush janë gratë dhe nëse djemtë e tyre janë vrarë në Ukrainë.
