Tre Qendra Votimi në Shoshë dhe Pult (Shkodër) nuk kanë zhvilluar votime për shkak të pamundësisë së komisionerëve për të shkuar në Qendrat e Votimit si rezultat i dëborës së dendur.
Komisioneri Shtetëror i Zgjedhjeve, Ilirjan Celibashi, tha se nuk ja vlente të rrezikonin jetën komisionerët për të shkuar atje.
Sesa kjo do të ndikojë në rezultat, Celibashi tha se mbetet për tu parë.
“Në tre Qendra Votimi nga 942 nuk ka filluar votimi pasi ka kaluar dhe afati prej 5 orësh, 13:00. Dy qendra në Shoshë dhe një në Pult .Nuk ka filluar votimi për shkak të pamundësisë së shkuarjes së anëtareve të komisioneve të QV për shkak të kushteve atmosferike. Votimi aty konsiderohet i pafilluar dhe i përfunduar. Nuk është votuar për arsye objektive, situata ka qenë në kushte ekstreme atmosferike. Nuk ja ka vlejt barra qiranë që të rrezikonin jetën për të shkuar atje. Dhe në këmbë e kanë pasur të pamundur për të shkuar komisionerët atje. Mbetet për tu vlerësuar pasi të përfundojë procesi. Sipas asaj që përcakton Kodi Zgjedhor, nëse zgjedhjet shpallen të pavlefshme në 1 apo disa QV dhe numri i votuesve është i tillë që është më i madh se diferenca mes kandidatit fitues dhe të dytë, zgjedhjet shpallen të pavlefshme në gjithë bashkinë. Mbetet për ty parë”, deklaroi Celibashi.
Janë rreth 1300 votues në listë, sipas Celibashit, që nuk e kanë ushtruar të drejtën e votës.
“Sa i takon problematikave në zgjedhje, nga totali i raportimeve në KQZ, 13% lidhen me kamerat e vëzhgimit në QV, 73% me përdorimin e pajisjes elektronike të identifikimit dhe vetëm 15% lidhen me çështje të administrimit të zgjedhjeve dhe sjelljen e komisioneve të QV. 40% e komunikimeve vijnë nga bashkia Shkodër, 33% nga Durrësi, 12% nga Lushnja, 9% nga Dibra, 6% nga Rrogozhina, nga Vora nuk ka. Për pajisjen e identifikimit elektronik vetëm në 5 QV nuk janë paraqitur operatorët, identifikimi është bërë përmes listës së zgjedhësve. Në 5 QV është bërë zëvendësimi i pajisjes”, tha ai.
Lidhur me kohën e hapjes së QV, 75% janë hapur në orën 7, 25% nga ora 7-7:30.
“Nuk raportohen problematika sinjikative. Ka probleme me mënyrën e zhvillimit të procesit të votimit. Kemi pasur raportime nga përfaqësues të partive politike për grumbullime të personave të pautorizuar në ambjentet e QV, kemi komunikuar me KZAZ respektive dhe komisionet e QV. Orari i mbylljes së votimit është 19:00”, tha Celibashi.
