Rusia shpalli hapjen e korridoreve humanitare për dy qytete të Ukrainës, të Shtunën, me qëllim që civilët të evakuohen.
Ministria ruse e Mbrojtjes njoftoi se “korridoret humanitare” do të hapen në orën 10:00 me orën e Moskës (07:00 GMT) në qytetet Mariupol dhe Volnovakha. Pra sipas Moskës zyrtare, armëpushimi i përkohshëm do të jetë për qytetet e Mariupol dhe Volnovakha për t’iu lënë kohë banorëve të largohen në të ashtuquajturat “korridore humanitare”.
Do të zbatohet një “pushim nga luftimet” që popullata civile të largohet nga qytetet.
Për këtë është rënë dakord me autoritetet ukrainase, njoftoi ministria e mbrojtjes sipas mediave ruse.
Megjithatë, ende nuk është parë ndonjë konfirmim nga pala ukrainase.
Më herët, kryebashkiaku i Mariupolit, Vadym Boichenko, bëri thirrje për një korridor humanitar mes atyre që ai i ka quajtur “sulme të pamëshirshme” nga trupat ruse.
Ende nuk është e qartë se sa një lëvizje e tillë do të jetë efektivë pasi shumë ukrainas kanë deklaruar se nuk do të largohen nga vendi dhe pjesa më e madhe e tyre raportohet se janë rreshtuar në krah të Rezistencës kundër trupave ruse.
