Nga Boldnews.al
Kryeministri Edi Rama kritikoi hapur kryetarin e Bashkisë së Himarës, Jorgo Goro, për pastrimin e bregdetit. Në një mbledhje me bashkiakë, ai tha se “jam dëshmitar dhe viktimë si një nga qytetarët e shumtë që në periudhën e pushimeve shkoj në Himarë, Dhërmi, s’e konceptoj dot”.
Madje, akuzat ishin të drejtpërdrejta për kreun e Bashkisë, pasi tha se “shikoj mbetjet, zgjoj Jorgon nga gjumi dhe pastaj vjen një dum-dum”. Por, çfarë po bën Goro pas “tërheqjes së veshit”?! Boldnews.al siguroi dokumentet e një tenderi që po zhvillon kryetari i Bashkisë së Himarës, i cili ka akorduar plot 3 milionë USD për të pastruar qytetin dhe zonat bregdetare. Pastrimi do të fillojë nga Palasa, ku kanë vilat një pjesë e mirë e oligarkëve dhe politikanëve dhe do të përfundojë në kufi me Sarandën.
Sipas dokumenteve që disponon BoldNeës.al, Jorgo Goro ka hapur tenderin me procedurë “mbi kufirin e lartë monetar” dhe me objekt “shërbimi i pastrimit të territorit të Bashkisë Himarë”. Loti i parë është pastrimi i qytetit Himarë dhe loti dy është pastrimi i Njësive Administrative Horë- Vranisht dhe Lukovë. Fondi limit i të dyja loteve është plot 289.674.042 lekë pa TVSH, ose rreth 3 milionë USD me TVSH.
Kohëzgjatja e kontratës është për zbatimin e saj është 36 muaj, pra për të dy lotet. Por, nga dokumentet që disponon Boldnews.al rezulton se pastrimi do të përqendrohet te zonat bregdetare, apo më saktë te resortet luksoze që janë ndërtuar dhe po ndërtohen në bregdetin e Himarës. Apo më saktë, i fshatrave turistikë të oligarkëve apo vilave të biznesmenëve dhe politikanëve, të cilat janë me shumicë në atë zonë.
Krahas specifikimeve se çfarë parashikohet të pastrohet, Jorgo Goro ka futur edhe disa zëra shpenzimesh për pastrimin e Himarës. Në dokumentet e tenderit ai shkruan se “nisur nga situata aktuale ambientale e regjimit të mbetjeve dhe përhapja e mbeturinave në mjediset e ndryshme në territorin e bashkisë Himarë, është tepër e nevojshme hartimi dhe implementimi i një plani që lidhet me edukimin publik ambiental të qytetarëve dhe jo vetëm”.
Firma fituese duhet të bëjë disa dëgjesa publike trajnimit të qytetarëve me të rinjtë e shkollave 9-vjeçare dhe të mesme, familjarët e zonave urbane të Himarës, Dhërmiut dhe fshatrave të tjerë. Gjithashtu edhe familjarët e zonave rurale, me përfaqësuesit dhe punonjësit e hoteleve restoranteve dhe bizneseve private. Madje, edhe me nëpunësit dhe specialistëve të bashkisë dhe kryepleqtë si dhe me shoqërinë civile.
Në dokumente shkruhet se “trajnimi dhe aksionet demostrative të parashikuara për edukimin publik ambiental te qytetareve do të shoqërohen edhe me spote publicitare të transmetuara në TV Lokal të qyteteve të Sarandës ose të Vlorës, fletë palosje, postera dhe banderola dhe reklama të ndryshme të dukshme për një pjesë të madhe të komunitetit të bashkisë Himarë”. Pra, edhe për trajnime dhe spote janë parashikuar të shpenzohen para’.
