Agjencia e Prokurimeve Publike u ka kërkuar institucioneve që gjatë tenderimeve të kontratave të shërbimeve të respektojnë kufijtë monetarë që janë përcaktuar më herët në një Vendim të Këshillit të Ministrave.
Në shkresën drejtuar enteve APP ka bërë të ditur që seti i dokumenteve që lidhet me këtë aspekt tashmë është publikuar.
“Agjencia e Prokurimit Publik (në vijim “APP”) njofton të gjitha palët e interesuara se, në zbatim të germës “e”, të nenit 23 të Ligjit 162, datë 23.12.2020 “Për Prokurimin Publik”, si dhe në zbatim të pikës 4, të Vendimit të Këshillit të Ministrave Nr. 768, datë 15.12.2021 “Për përcaktimin e llojeve të shërbimeve sociale dhe shërbimeve të tjera specifike, llojeve të shërbimeve të veçanta, për të cilat mund të rezervohet e drejta e pjesëmarrjes së organizatave në procedurat e prokurimit publik, si dhe rregullave të detajuara për prokurimin e tyre” (në vijim “VKM”), me Vendimin Nr.01, datë 25.02.2022, ka miratuar Dokumentet Standarde të Prokurimit të Shërbimeve Sociale dhe Shërbimeve të tjera Specifike.
Sjellim në vëmendje të autoriteteve/enteve kontraktore, respektimin e kufirit monetar të parashikuar në këtë VKM, për kontratat e shërbimeve sipas kodeve respektive (objekt i këtij vendimi), për të cilat do të zhvillohet procedura e prokurimit.
Ndërsa, shërbimet, objekt i këtij vendimi, vlera e përllogaritur e të cilave nuk është më e madhe se kufiri monetar i parashikuar në pikën 2 të nenit 5 të VKM, për efekt transparence, autoritetet/entet kontraktore duhet t’i pasqyrojnë në Regjistrin e Parashikimeve dhe Regjistrin e Realizimit të procedurave të prokurimit.
Ky set, gjendet i publikuar në faqen zyrtare të APP, dhe të gjitha autoritetet/entet kontraktore duhet të marrin masat për zbatimin e këtij vendimi” thuhet në njoftimin e APP.
Në vendimin e qeverisë të miratuar në mes të dhjetorit të vitit të shkuar u miratuan kufijtë monetarë për kontratat e shërbimeve ku për kontratat klasike kufiri është 90 milionë lekë kurse për kontratat sektoriale 120 milionë lekë.
I njëjti vendim sanksiononte se për shërbimet objekt i këtij vendimi që nisnin nga ato rekreative kulturore tek hoteleria e restorantet apo kujdesi shëndetësor kur kanë vlerë më të madhe se 20 milionë lekë enti kontraktor nuk i nënshtrohet procedurave të prokurimit. /Monitor/
