Shefi i politikës së Jashtme të Bashkimit Evropian, Josep Borrell ka deklaruar se sanksionet e vendosura si rezultat i luftës në Ukrainë nuk kanë të bëjnë me qëllimin për të ndryshuar regjimin në Rusi.
“Ne nuk jemi për ndryshimin e regjimit. Sanksionet nuk janë për të provokuar një ndryshim regjimi në Rusi. Përkundrazi, sanksionet janë shkaktuar nga lufta. Dhe qëllimi është të dobësohet ekonomia ruse, të bëhet ekonomia ruse të ndjejë peshën e pasojave dhe të rritet, forcojë pozicionin e ukrainasve në negociatat e ardhshme. Por nuk ka lidhje me ndryshimin e regjimit”, tha ai.
Ai u shpreh gjithashtu se sanksionet nuk do t’i japin fund luftës në Ukrainë menjëherë.
“Ne mund të bëjmë shumë gjëra, por nëse njerëzit presin që sanksionet financiare të ndalojnë luftën brenda natës, ata nuk e dinë se për çfarë po flasin. Fatkeqësisht, ne nuk kemi aftësinë për ta ndalur luftën kështu siç ka nisur. Ajo që ne mund të bëjmë është të dobësojmë ndjeshëm ekonominë ruse me kalimin e kohës” tha ai.
Sipas tij, përgjigja e BE-së nuk ishte kundër popullit rus, por për të mbështetur normat ndërkombëtare.
“Kjo nuk është Lindja kundër Perëndimit. Kjo nuk është një rikthim te Lufta e Ftohtë. Ne po mbrojmë sovranitetin e kombeve. Ne po mbrojmë integritetin territorial të shteteve. Në Lindje, në Perëndim, në Veri dhe në Jug. Nuk është betejë e dy hemisferave. Ne mbrojmë të drejtën ndërkombëtare, sovranitetin e shteteve, integritetin territorial, mosshkelja e kufijve është diçka që është e vlefshme për këdo në botë. Ne nuk jemi armiq të popullit rus, ne jemi miq të Ukrainës, ne po i mbështesim ata në luftën e tyre, por nuk jemi kundër popullit rus”, tha Borrell.
“Kjo është lufta e Putinit dhe vetëm Putini mund ta përfundojë atë”, shtoi Borrell. Borrell tha gjithashtu se BE-ja nuk do t’i kërkojë presidentit ukrainas Volodymyr Zelensky të dorëzohet.
“Ne nuk do t’i kërkojmë Zelenskit të largohet nga Kievi, ne nuk do t’i kërkojmë atij të ndalojë së luftuari”
