Maria dhe Armando Dosku, së bashku me dy fëmijët e tyre dyshohet se janë vrarë nga pronari i banesës së tyre. Ngjarja ndodhi mbrëmjen e kaluar në Andravidha të Greqisë. Sipas policisë greke, autor i dyshuar është një grek, i zoti i banesës në të cilën jetonte me qera familja shqiptare.
Policia thotë se është çështje kohe gjetja dhe arrestimi i autorit. Jashtë kamerave fqinjët thonë se ai ka probleme të çrregullimit mendor. Në të kaluarën ai është mbajtur për pak kohë në një spital psikiatrik, dhe pasi ka dalë ka vazhduar aktet mizore duke keqtrajtuar dy ish gratë e tij, fqinjët, e madje edhe kafshët shtëpiake të banorëve të tjerë.
‘Protothema’ shkruan se në zonë për familjen shqiptare fqinjët thonë se bëhet fjalë për njerëz shumë punëtorë e fjalë pak. Ata ndodheshin në zonë për rreth 2 vjet dhe nuk kishin krijuar asnjëherë asnjë problem.
Fillimisht u dyshua se autori kryesor ishte ish-bashkëshorti i shqiptares, me të cilën ka një fëmijë. Mirëpo ai kishte një alibi për natën e krimit, por megjithatë do të udhëtojë drejt Andravidas pasi i mbijetuari i vetëm i familjes, 12-vjeçari që gjeti familjen e pajetë është djali i tij nga martesa e mëparshme.
Çifti shqiptar ishte prej disa muajsh në vështirësi financiare pasi nuk mundeshin që të paguanin qeranë.