Presidenti i Bjellorusisë Alexander Lukashenko ka paralajmëruar Perëndimin kundër vendosjes së sanksioneve të ashpra ndaj Moskës, duke thënë se masa të tilla mund ta shtyjnë Rusinë në një “luftë të tretë botërore”.
“Tani po flitet shumë kundër sektorit bankar. Gazi, nafta, SWIFT. Është më keq se lufta. Kjo po e shtyn Rusinë në një luftë të tretë botërore”, tha Lukashenko të Dielën, cituar nga mediat ruse. Ai shtoi se një konflikt bërthamor mund të jetë rezultati përfundimtar.
Sulmi ushtarak i Rusisë kundër Ukrainës, i urdhëruar nga presidenti rus Vladimir Putin më 24 shkurt, është dënuar nga vendet perëndimore dhe ka sjellë një valë të re sanksionesh kundër Moskës.
“Këtu duhet të jemi të përmbajtur që të mos futemi në telashe. Sepse lufta bërthamore është fundi i gjithçkaje”, citohet Lukashenko, i cilësuar si “kukulla e Vladimir Putin”.
Në lëvizjen e fundit kundër Moskës, BE-ja, Britania e Madhe, Kanadaja dhe SHBA-ja thanë se “bankat e zgjedhura ruse” do të shkëputeshin nga sistemi i pagesave ndërkombëtare SWIFT – një masë që Rusia e ka paralajmëruar në të kaluarën se do të konsiderohej si një deklaratë lufte. Pavarësisht kërcënimit për masa të mëtejshme, Lukashenko theksoi se Rusia dhe Bjellorusia do ti “mbijetojnë” çdo sanksion.
“Ne kemi përvojë. Ne e diskutuam këtë temë me Putinin më shumë se një herë. Ne do të mbijetojmë. Është e pamundur të na vdesin urie”, tha ai.
Masat hakmarrëse që po zhvillohen nga Moska dhe Minsk do të jenë “shumë të prekshme”, por është e rëndësishme t’i mendojmë ato “me shumë kujdes” për të mos lënduar veten, tha Lukashenko.
Udhëheqësi i Bjellorusisë ka thënë gjithashtu se nëse Perëndimi do të lëvizte për të vendosur armë bërthamore në vendet kufitare, ai do t’i kërkonte Putinit t’i “kthejë” armët e veta bërthamore Bjellorusisë.
Moska tha të dielën se Ukraina ka rënë dakord të dërgojë një ekip negociatorësh në Bjellorusi për bisedime mbi përfundimin e konfliktit ushtarak. Bisedimet do të zhvillohen në rajonin Gomel, afër kufijve të Rusisë dhe Ukrainës, tha kryenegociatori rus Vladimir Medinsky.
Putin e ka justifikuar ofensivën e tij ushtarake kundër Ukrainës duke thënë se kishte një nevojë urgjente për të “çmilitarizuar” vendin për të mbrojtur Republikat Popullore të Donetsk dhe Lugansk të saponjohura nga Moska dhe për të siguruar që Rusia të mos kërcënohej nga NATO, nga territori ukrainas. Kievi e ka quajtur sulmin të paprovokuar dhe të pajustifikuar.
