Indrit Sefa, kandidati për kryebashkiak i Lushnjes, i cili garon në siglën e PD, ishte pjesë e një debati me të rinjtë për zgjedhjet e 6 marsit, ku nuk kanë marrë pjesë dy kandidatët e tjerë, i PS dhe i koalicionit “Shtëpia e Lirisë”.
“Për fat të keq, 2 kandidatët e tjerë, e refuzuan ftesën për debat të organizuar nga “Qëndresa Qytetare”, me mbështetjen e Ambasadës së Britanisë së Madhe. Asgjë e re nga ky front. Kandidatët e PS dhe LSI-PDK-së kanë prioritet ata që i sponsorizojnë, jo qytetarët. I ftova që në hapje të fushatës për të zhvilluar një debat mbi idetë tona për t’i shërbyer Lushnjes në këtë vit të mbetur të mandatit. Ata heshtën, në mungesë të plotë respekti për lushnjarët”, shkruan Indrit Sefa në një postim në rrjetet sociale.
Sipas tij, mospjesëmarrja në debat është shenjë dobësie dhe konfirmim i paaftësisë për të drejtuar një bashki në interes të qytetarëve.
“Gjatë bashkëbisedimit i sigurova të rinjtë se Bashkia do t’u kthehet qytetarëve dhe do të jetë në shërbim të tyre.
Plani i Emergjencës në kontratën time 1 vjeçare ka disa pika kyçe:
1. Përmirësimi i infrastrukturës në rrugë dhe shkolla;
2. Mbështetja për fermerët dhe për infrastrukturën e punës së tyre;
3. Mbështetja e të rinjve për punësim;
Së bashku ne do të sjellim ndryshimin!🤝”, shkruan Sefa.
