Ish-Kryeministri Sali Berisha gjatë takimit me banorë të Dajçit ka premtuar shlyerjen e borxhit që shteti ka ndaj tyre për shkak të përmbytjeve.
“Për dy përmbytje ju u dëmshpërblyet, por për përmbytjen e tretë ju kemi një borxh, që do e shlyejmë një për një, sapo të vijë PD në pushtet. Do krijojmë një ligj që të detyrojmë KESH t’ju dëmshpërblejë juve sa herë të keni përmbytje nga digat, pasi ligji parashikon se kush të përmbyt ai edhe të dëmshpërblen”, tha Berisha.
Duke folur për rritjen e imputeve bujqësore, Berisha tha se çmimet rriten pasi këto impute i kanë monopolet e lidhura me qeveritarët.
“Ju paguani naftën njëlloj si fermerët në Zvicër apo Suedi, në një kohë që ata shesin prodhimet e tyre 6 herë më të larta se ato që aplikoni ju.
Kjo politikë e Edi Ramës ka vetëm një qëllim> shpopullimin e vendit, largimin e shqiptarëve, shkretimin e vendit”, tha Berisha.
Ish-Kryeministri tha se për shkak të mungesës së politikave në mbështetje të fermerëve, sot po shkatërrohen fermerët, dhe kemi arritur që edhe vezët apo qumështin e fusim kontrabandë nga Serbia, Greqia e kështu me rradhë.
“Ju s’mund të konkuroni me fermerët në Serbi, pasi ato kanë subvencione të mëdha, atëherë ju detyroheni të lini tokat djerrë dhe të ikni, edhe pse keni tokat më pjellore”, tha Berisha.
Lidhur me zgjedhjet e 6 marsit, Berisha tha se ne duhet të mbjellim shpresën te shqiptarët, pavarësisht se janë zgjedhje lokale, por kanë interes kombëtar.
Berisha tha se për të gjithë këtë situatë një përgjegjësi të padiskutueshme ka pasur lidershipi i Partisë Deokratike.
“Ku ishte opozita, kur rritej varfëria, kur shpopullohej ky vend? Të rinjtë ikën se nuk kishin shpresë te PD dhe lidershipi i saj”, tha Berisha.
