Vazhdojnë hetimet për shkakun e vrasjes së nënoficerit Altin Alikaj në Vlorë, që u gjet pa jetë në shtëpinë e tij më 19 shkurt. Policia e Vlorës njoftoi sot se ka arrestuar dy persona për vrasjen: Shazi Ahmetajt nga kolonja e Lushnjës si autor dhe Mateo Kiptiun, edhe ai nga Kolonja si përkrahës i autorit.
Sipas burimeve, pista kryesore për kryerjen e krimit mendohet të jetë prishja e pazareve të drogës, por që pritet të konfirmohet.
Gjithashtu nuk përjashtohet as pista e një borxhi si rrjedhojë e lëndëve narkotike, pasi viktima Altin Alikaj kohët e fundit ishte parë të kishte një shumë të konsiderueshme lekësh nëpër duar, që nuk ishte e zakonshme për të.
Dyshohet se ai ka pasur një sasi lënde narkotike që e ka shitur dhe më pas nuk ia ka kthyer paratë e borxhit, Shazi Ahmetajt. Gjithsesi, gjithçka mbetet për t’u konfirmuar nga Policia.
