Ish-kryeministri Sali Berisha ka dënuar sulmin e Rusisë ndaj Ukrainës.
“Rusia me agresionin ndaj Ukrainës nisi Luftën e Tretë Botërore?! Të dashur miq, diktatori gjakësor rus Vladimir Putin nisi sot agresionin ushtarak në shkallë të gjerë për pushtimin e Ukrainës së lirë dhe të pavarur. Ky agresion duket se shënon fundin e paqes së pas-Luftës së Dytë Boterore dhe fillimin e Luftës së Tretë Botërore. Luftën e Parë Botërore ‘de facto’ e nisi Rusia, Luftën e Dytë Botërore e nisi Hitleri dhe Gjermania naziste, të cilës në krye të radhës pas paktit Ribentrop-Molotov iu bashkua dhe Rusia”, shprehet Berisha në një reagim shpërndarë në rrjetet sociale.
“Rusia, që me agresionin ndaj Ukrainës nisi për ambiciet e saj imperiale Luftën e Tretë Botërore, do të humbasë këtë luftë. Shqipëria, ish viktima e parë e Luftës së Dytë Botërore, është sot anëtare e NATO-s. Liri Ukrainës! Vdekje pushtuesve rusë”, shton ish-kryeministri.
Të njëjtin qëndrim mbajti dhe nga foltorja e parlamentit.
Berisha u shpreh po ashtu se dënon “qëndrimin kapitullues të këtij parlamenti, të turpshëm, të paimagjinueshëm të një vendi anëtar të NATO-s, që nuk miratoi një rezolutë për të dënuar agresorët, për të dënuar Rusinë që është nismëtare e Luftës së Parë Botërore”.
“Iu bashkëngjit Hitlerit me paktin Ribentrop-Molotov me pushtimin e Polonisë dhe nis tani e vetme pushtimin e një vendi të pavarur dhe sovran. Shqipëria dhe ky parlament mban të njëjtin qëndrim si Rusia e vogël apo ndryshe Serbia. Si mund të justifikojë këtë qëndrim ky parlament ndaj një vendi që historikisht u ka bërë shqiptarëve, të këqijat më të mëdha të kohërave. Kjo është dëshmi e vasalitetit të plotë ndaj Beogradit. Si ka mundësi? Atje po bien bomba mbi njerëzit e lirë dhe të pafajshëm dhe ne nuk miratojmë një rezolutë të përbashkët për dënimin e këtij agresioni të pashembullt. Kjo është histori turpi, histori kapitullimi. Nastyrisht ka një përgjegjës dhe ky është Edi Rama, vasali i Vuçiçit. Solidaritet me kombin ukrainas! Vdekje për pushtuesit rusë”, shtoi Berisha.
