Policia e Sarandës njoftoi dje arrestimin e drejtueses së IMT Sarandë, Romina Pulaj, me akuzën se kishte shpërdoruar detyrën, duke lejuar ndërtimin e një objekti pa leje. Gjithashtu policia njoftoi se kishte shpallur në kërkim edhe një shtetas, Pando Papuçi, 66 vjeç për ndërtim të paligshëm.
Në njoftimin e policisë flitej se arrestimi i zyrtares së IMT Sarandë dhe shpallja në kërkim e 66-vjeçarit u bë pas një hetimi 3 mujor. Gjithkush që e lexon këtë njoftim policie, bindet se pas 3 muajsh hetimesh intensive, policia dhe prokuroria e Sarandës, kishin arritur në zbardhin përgjegjësitë e Romina Pulajt me detyrë shefe e IMT Sarandë, por edhe shkeljen e ligjit nga 66-vjeçari.
Por e vërteta duket se qëndron krejt ndryshe, dhe më tepër se një operacion policor i suksesshëm, duket se kemi të bëjmë në rastin më të mirë me një bllof të policisë dhe organit të akuzës.
Boldnews.al disponon disa dokumente që provojnë, se objekti për të cilin u krye arrestimi ditën e djeshme i Pulajt është me leje ndërtimi, madje e konfirmuar kjo edhe nga Gjykata. Atëherë pyetja që lind është: çfarë hetimi ka kryer Policia apo Prokuroria në 3 muaj, kur minimalisht nuk ka qenë në gjendje të disponojë edhe një vendim Gjykate?
Përtej arsyeve, situata që çoi në arrestimin dhe shpalljen në kërkim të 66 vjeçarit, ka nisur pas një denoncimi të një ndërtuesi, i cili kishte filluar ndërtimin e godinës, por nuk ka respektuar afatet kohore që ka pasur në kontratën me pronarin e tokës. Pikërisht ky i fundit, Pando Papuçi, është 66-vjeçari që u shpall në kërkim nga Policia, me akuzën e ndërtimit të paligjshëm. Papuçi duke parë se ndërtuesi nuk ka respektuar afatet ka vendosur që të prishë kontratën dhe të themelojë vetë një kompani, për vijimin e punimeve në objektin, që konsiderohet i paligjshëm.
Bazuar në dokumentet që disponon Boldnews, të cilat mund ti shikoni më poshtë, leja e ndërtimit për objektin që konsiderohet si ndërtim i paligjshëm, është rinovuar me vendim gjykate në 2017 dhe 2020. Pra, për objektin në fjalë ka pasur një leje dhe për më tepër të rinovuar me vendim gjykate.Por çuditërisht në Bashkinë e Sarandës, kjo leje nuk ndodhej në dosjen e kërkuar nga Krimi Ekonomik pranë Komisariatit të Policisë Sarandë, gjë që çoi në arrestimin e drejtueseses së IMT dhe shpalljen në kërkim të 66-vjeçarit.
Nga burime, Boldnews ka mësuar se dosja e lejes së ndërtimit i është dorëzuar vetëm sot Prokurorisë së Sarandës.
Më poshtë janë edhe dokumentet që provojnë se objekti ka një leje ndërtimi dhe se gjithçka ka nisur mes një konflikti që ka pasur pronari i tokës me ndërtuesin, gjë që është pasuar me operacionin policor për arrestimin e një zyrtareje dhe shpalljen në kërkim të 66-vjeçarit. /BN/
