I shoqëruar nga Enkelejd Alibeaj dhe Agron Gjekmarkaj, të cilët i ka emëruar nënkryetarë të partisë që drejton, Lulzim Basha ka firmosur sot peticionin e dekomunistizimit, të vendosur në sheshin “Skënderbej”. Nën tingujt e këngës “Wind of Change” të Scorpions, Basha ka kujtuar në këtë mënyrë, 31 vjetorin e rrëzimit të bustit të diktatorit Enver Hoxha.
Disa dhjetra qytetarë i janë bashkuar nismës së dekomunistizimin, ndërsa 20 shkurti është dita simbol e rrëzimit të komunizmit, e lidhur kjo me rrëzimin e bustit të diktatorit.
Basha ka mbështetur ndarjen nga e shkuara. “Ndodhem këtu me deputetët e PD, me qytetarët, me të rinjtë, jemi shumica morale, që kujtojmë 31 vjetorin e rrëzimit të shtatores së Enver Hoxhës”, tha Basha. Sipas tij, ajo që u arrit në 20 shkurtin e 1991 është e pjesshme.
“Gëzuar 20 shkurtin, ditën e largimit nga sheshi të hijes së rëndë të diktatorit, kjo ditë i takon të gjithë shqiptarëve”, tha Basha. Sipas tij, kulti i individit shkatërron çdo shoqëri.
“Ndjesë të thellë në emër të PD drejtuar të përndjekurve politikë dhe pasardhësve të tyre, për mospërmbushjen e detyrimeve”, tha Basha. Sipas tij, ne ngritëm një njeri si shoqëri, i krijuam një shtatore të lartë, dhe u shkatërruam si shoqëri.
“Do ndalojmë ligjërimin lavdërues të diktaturës dhe përdorimin e simboleve të komunizmit. Vettingun e funksionarëve politikë në raport me të shkuarën e tyre në kohën e diktaturës”, tha Basha, duke shtuar edhe zbardhjen e plotë të aktivitetit kriminal gjatë diktaturës dhe publikimin e tyre, pa mbajtur të fshehtat.
