Afrikani që tentoi të fuste në Shqipëri mbi 1 milion euro të falsifikuara do të qëndrojë në burg. Kamerunasi Josoue Ngankam u shfaq para gjykatës këtë të shtunë i përlotur, ndërsa dha disa versione kontradiktore. Ndërkohë, Prokuroria dhe krimi ekonomik po heton lidhjet e tij në Shqipëri.
Gjykata e Tiranës caktoi masën e sigurisë arrest me burg për Josoue Ngankam. Për këtë rast në seancë u paraqit edhe një përkthyese e certifikuar nga ministria e drejtësisë. 53-vjeçari nga Kameruni, por me leje qëndrimi në Francë u ndalua të mërkurën në aeroportin e Rinasit. Në valixhen e rrobave iu gjetën 1 milion e 75 mijë euro të falsifikuara.
Për të mbërritur në Shqipëri, afrikani kishte ndjekur itinerarin Lion-Stamboll-Rinas.
Kontrolli i detajuar zbuloi se në valixhe kishte fshehur edhe letra të tjera dhe pajisje për përgatitjen e kartëmonedhave. Ajo që ka ngritur shqetësime është se Ngankam kishte qenë në Shqipëri edhe më herët. Kamerunasi ka mbërritur në Rinas edhe në 7 janar të këtij viti për të dalë nga Shqipëria më 12 janar me destinacion Varshavën në Poloni.
Hetuesit po verifikojnë çdo të dhënë pasi dyshojnë se 53-vjeçari ka bashkëpunëtorë në Shqipëri, ndërsa nuk përjashtohet mundësia që në mbërritjen e parë në vendin tonë të ketë futur kartmonedha false.
Në deklarimet e tij, kamerunasi është shprehur se valixhen ja ka dhënë një bashkëkombës i tij me emrin Toni. Policia ka parë kamerat e sigurisë së aeroportit “Nënë Tereza”, por pa mundur të identifikojë ndonjë person që e priste. Edhe gjatë pyetjes në komisariat, kamerunasi ka qenë kontadiktor duke dhënë disa versione, ndërsa shuma e parave false që tentoi të fuste në vendin tonë është më e madhja e kapur ndonjëherë nga policia.
