Festa për fitoren në Ligën e Kampioneve ndaj Real Madrid duket se ka zgjatur më shumë se sa duhet për PSG-në, që sot ka marrë një shuplakë të mirë në kampionat nga skuadra e Nantës, duke u mundur me shifrat 3-1. Një rezultat që gjithsesi nuk do të ndikojë në rrugën e titullit pasi ekipi ka një diferencë prej 13 pikësh ndaj Marsejës që e ndjek në vendin e dytë.
Nanta bëri gjithçka mirë dhe që pas 16 minutave të para kishte avantazh të dyfishtë me Muani dhe Merlin. Ndërkohë në shtesën e pjesës së parë erdhi edhe goli i 3-0 me penalltinë e Bias. PSG reagoi në pjesën e dytë dhe shkurtoi 2 minuta pas rifillimit diferencën falë një kombinimi Mesi-Nejmar.
Braziliani ishte ai i cili kishte mundësinë të hapte plotësisht ndeshjen, pasi ekzekutoi një penallti në minutën e 59 të duelit. Por ai gjuajti në mënyrë të shëmtuar, aq sa portieri e priti topin me shumë lehtësi duke ruajtur avantazhin e dy golave për skuadrën e tij.
PSG tentoi në çdo mënyrë të shënonte, por Nanta u kthye në mbrojtje dhe la pak hapësira për Mesi & Co, duke i shkaktuar kësisoj humbjen e dytë në kampionat në këtë sezon ekipit të Poçetinos.
