Ish-Kryeministri Sali Berisha u bëri thirrje sot dibranëve që të mbështesin kandidatin e “Shtëpisë së Lirisë”, Premtim Kryemadhi, në zgjedhjet e 6 marsit.
Nga Kalaja e Dodës, Berisha tha se asnjë votë nuk duhet ti shkojë kandidatit të Lulzim bravës, sikundër ai quan Lulzim Bashën, për të cilin tha se është peng i Edi Ramës.
Ish-Kryeministri iu drejtua në veçanti demokratëve të lëkundur për t’iu shpjeguar arsyet pse Lulzim Basha është peng i Kryeministrit Edi Rama, duke u sjellë si dëshmi kryesore, mbylljen e dosjes së “Toyota Yaris”.
“Kemi edhe kandidatin e Lul Bravës, të cilit Edi Rama me gjykatës dhe policsë, në një akt të shëmtuar, i ka dhënë logon e PD-së dhe përpiqet t’iu mashtrojë ju “se jemi PD-ja!!!.
Lulzim Brava përfaqëson një peng të vërtetë. Ndaj u bëj thirrje demokratëve të Kalasë së Dodës dhe të Peshkopisë, asnjë votë për pengun! Çdo votë për pengun, është humbje për PD-në. Është votë e munguar për PD-në.
Po do të thoni ju pse i them unë “peng”?! Ia them “peng” me baza, sepse Edi Rama, përveçse ka krijuar ndërmarrje të përbashkëta, por ia mbylli dosjen e “Toyota Yaris”. Çdonjeri që do të deklaronte në parlament se ditën e shtunë do të vijë makina plot me euro, do të ishte sot brenda në çdo shtet të botës sepse dekonspironte operacionin e policive të disa shteteve.
Dhe prokuroria i hapi dosjen Lulzim Bravës, ia mbylli Edi Rama për ta marrë peng.
Së fundmi do t’u them këtyre miqve të mi demokratë që akoma nuk e kanë vendosur apo mendojnë se Lulzim Brava është – se thotë se është edhe dibran. Po ai s’e di nga është, jua them unë juve. Jua tregoj unë. Ai bënte takim në Tiranë dhe kur shkuan edhe e ftuan hajde se të kemi dibran, “jo, nuk jam dibran unë, se e kam gjyshin se ka ardhur gjyshi nga Mitrovica!!!”.
Por e lëmë këtë, rëndësi ka që atë s’e lidh asgjë me Dibrën. Absolutisht!
Ndaj dhe asnjë votë për Lulzim Bravën! Të gjitha votat për Premtim Kryemadhin dhe kjo është logoja e fitores: Shtëpia e Lirisë!”, tha Berisha.
Ai shtoi se e kemi quajtur Shtëpi se jemi si familje të gjithë së bashku, e kemi Liri sepse premtuan lirinë, premtuan votën e lirë. Tetë vite premtoi Lulzim Brava dhe nuk e solli, tre muaj e premtuam ne , sot Premtim Kryemadhi është kandidati juaj, nuk është kandidati i drejtuesve të PD-së.
