Resmi Hasanpapa është efektivi i Policisë Rrugore që prej gjashtë vitesh punon si vullnetar Komisariatit Rajonal të Policisë Rrugore Tiranë. Ai ka marrë një donacion sot nga Shoqata Amerikano-Shqiptare e Zbatimit të Ligjit, donacion prej 10.000 dollarësh që i është dhënë nga shefi i Komisariatit të Policisë Rrugore Besmir Qibini.
Resmi Hasanpapa ka një histori të trishtë. Bashkë me kolegun e tij Allaman Dervishi ata kanë ndaluar në Tiranë një mjet të vjedhur dhe janë përleshur me dy autorët e armatosur, të cilët më pas kanë hapur dhe zjarr ndaj efektivëve.
Allaman Dervishi mbeti i vdekur në vend dhe u shpall “Dëshmor i Atdheut”, ndërsa Resmi Hasanpapa mori një plumb në këmbë i cili e la në karrige me rroga gjatë pjesës tjetër të jetës. Por pavarësisht kësaj fatkeqësie që i ndryshoi jetën, efektivi i Policisë nuk e humbi kurrë dëshirën dhe vullnetin për t’ju shërbyer qytetarëve.
Shefi i Policisë Rrugore të Tiranës Besmir Qibini, ndër të tjera ka theksuar se që prej vitit 2016, efektivi është integruar duke dhënë kontributin e tij vullnetar pranë Komisariatit Rajonal të Policisë Rrugore Tiranë. Qibini i ka dorëzuar Resmi Hasanpapës një “çek të artë” prej 10.000 dollarësh si donacion i Shoqata Amerikano-Shqiptare.
Përfaqësuesi i Shoqatës Erald Krisafi, në emër të drejtuesit të shoqatës Elton Shametaj, i ka dhuruar çekun z. Hasanpapa, dhe është shprehur se kjo shoqatë do të jetë gjithmonë e gatshme për t’i ardhur në ndihmë punonjësve të Policisë.
Ish-punonjësi i Policisë Resmi Hasanpapa ka falënderuar përfaqësuesin e shoqatës, për vlerësimin dhe për donacionin. Gjithashtu, ai ka falënderuar Drejtorin e Përgjithshëm të Policisë së Shtetit, për vëmendjen që tregon ndaj punonjësve të Policisë që kanë mbetur të dëmtuar gjatë kryerjes së detyrës, po ashtu dhe ndaj familjarëve të Dëshmorëve të Policisë.
